Anarâškielâ servi já Umesämikielâ servi algâttii ohtsii proojeekt 1.9.2025. Proojeekt nommâ lii ”Online tools for Inari Saami and Ume Saami language learning” ađai ”Nettipiergâseh anarâškielâ já umesämikielâ oppâmân”. Proojeekt ulmen lii rähtiđ uđđâ nettipiergâsijd já jieškote-uvlágánijd oppâmateriaalijd anarâškielâ já umesämikielâ várás. Proojeekt pištá kulmâ ive.
Proojeekt pargeeh teivii Uumajast 15.–17.9.2025. Ohjelmist lâi kuulmâpiäivásâš pargopáájá páihálii sämikulttuurkuávdáást. Pargeeh uápásmuvvii nubijdis já vuávájii pargoid loppâihán.
Proojeekt stivrejeijee lii Fabrizio Brecciaroli Anarâškielâ seervist. Tiätutekniikist já ohjelmistmist västid Pauli Rämö. Ruotâ peln pargeeh láá Michael Grahn, Signe Grahn, Mira Dahlberg já Simon Forsmark. Michael oopâi umesämikielâ párnážin já lii lamaš pargoost umesämikielâ máttáátteijen jieškote-uvlágánijn škoovlâin. Sun lii tääl čokkiimin umesämikielâ sänikirje. Signe lii Michael nieidâ. Sun lii puáhtám luuhâđ umesämikielâ ejijnis pärnivuođâ rääjist. Signe lii 22-ihásâš já haalijd rähtiđ uđđâ oppâmateriaalijd, tastko toh láá tääl vääniht. Mira lii 21-ihásâš, já suu suuhâ lii umesämmilâš. Sun lâi Michael uáppee paješkoovlâst. Sehe Signe já Mira pargon proojeekt aalgâst lii litteristiđ paddiimijd. Ton lasseen Mira čáálá uđđâsijd já someviestâid proojeekt ovdánmist. Simon máttát uásiáigásávt umesämikielâ. Suu eeji peerâ lii umesämmilâš, já sun haalijd finniđ maassâd suuvâs monâttum kielâ. Sun lâi ovdil Umesämikielâ seervi saavâjođetteijee já lii tääl ton čällee. Sun lii lamaš uáli jo aktiivlâš umesämikielâ iäláskitmist jo maaŋgâid iivijd. Proojeekt aalgâst Simon pargon lii litteristiđ paddiimijd, koordinistiđ umesämikielâ pargeid já hoittáđ keevâtlijd proojeektaašijd Ruotâ peln.
Pargopáájá loopâst tollui Ovtâstum Aalmugij páájá kilelis ovdánmist. Teeman lijjii kilelis ovdánem ulmeh (SDGs, Sustainable Development Goals). Proojeekt vuosâsajasâš ulme lii SDG 4 ađai ”Pyeri škovlim”. Eres ulmeh láá SDG 9 ađai ”Ráhtulâšvuotâ, innovaatio já infrastruktuur”, SDG 10 ađai ”Ucceeb eresárvusâšvuotâ”, SDG 11 ađai ”Kilelis kaavpugeh já siärváduvah” sehe SDG 17 ađai ”Ohtsâšpargo uulmij juksâm oovdân”.
Proojeekt válduruttâdeijee lii Euroop Union. Eres ruttâdeijeeh láá Laapi litto Suomâ peln sehe Västerbotten já Norrbotten läänih Ruotâ peln.
Koveh: Interreg Aurora (logo) já Simon Forsmark (artikkâlkove)