Microsoft looppât Windows 10 ‑kevttimvuáháduv torjuu roovvâdmáánu 14. peeivi. Ton maŋa kevttimvuáhádâh tuáimá vala, mutâ toos ij innig finnii tiätutorvopeividmijd ige ereskin peividmijd. Taat meerhâš tom, ete puoh uđđâ riiskah já tiätutorvorääigih, moh kávnojeh puátteevuođâst, pääcih tivohánnáá. Talle tiättur kevttim eromâšávt viermiohtâvuođáin sáttá leđe varâlâš.
Jis tiättur tiävdá Windows 11 vátámušâid, te kevttee puáhtá stelliđ tom. Jis vist tiättur ij teevdi vátámušâid, te kevttee puáhtá jo-uv stelliđ Windows sajan Linux-kevttimvuáháduv, irâttiđ stelliđ Windows 11 epivirgálávt, uástiđ uđđâ tiättur teikâ juátkiđ uhkevuálásii tiättur kevttim.
Microsoft miärádâs torjuu looppâtmist lii árvuštâllum tast, ete tot páággut ulmuid uástiđ uđđâ tiäturijd, veikâ sii puáris mašineh mudoi toimâččii vala pyereest. Right to Repair ‑kulâtteijeeseervi kampanjahovdâ Cristina Ganopini iätá, ete joba 400 miljovn tiäturid puárásmeh liijkás tooláá.
Vijđedum torvolâšvuotâpeividmij ohjelm kulâtteijeid
Ohtân muulsâiähtun lii vala Microsoft vijđedum torvolâšvuotâpeividmij ohjelm, mii juátká torjuu ovttáin ivvijn 13.10.2026 räi. Ohjelm lii uáivildum kulâtteijeid.
Algâalgâlávt ohjelmân puovtij servâđ jo-uv kevttimáin tuhháát Microsoft Rewards ‑čyegisid, mäksimáin 30 dollarid teikâ vuorkkiimáin tiäđuidis Microsoft polvâpalvâlusân. Euroop ekonomiakuávlust ohjelmân puáhtá kuittâg servâđ tääl nuuvt, ete ulmuuh iä taarbâš vuolgâttiđ tiäđuidis teikâ tiiláđ palvâlusâid. Kijttoseh täst kuleh ovdâmerkkân tagaráid servijd ko Right to Repair já Euroconsumers, moh láá árvuštâllâm Microsoft tast, ete teháliih torvolâšvuotâpeividmeh váđáččii laseiävtuid já ‑tooimâid.
Ohjelm váátá tom, ete tiäturist lii Windows 10 versio 22H2 Home, Professional, Pro Education teikâ Workstations já meid tom, ete kevttest lii paijeentuállee (suom. järjestelmänvalvoja) Microsoft-tili, moin sun registerist ohjelmân.
Ohjelmân puáhtá servâđ tánávt:
- leehâst Stelliittâsah (suom. Asetukset)
- moonâ Windows Update ‑siijđon
- uusâ almottâs Windows 10 torjuu nuhâmist já spokkâlist ”Registerist tääl”.
Almottâs ij veltihánnáá oinuu puoh kevtteid. Talle tot sáttá puáttiđ maŋeláá ovdâmerkkân uđđâ peividem fáárust. Jis tun jieh lah kiävttám Microsoft Edge-lađđuu, te ohtâ vyehi, moin almottâs máhđulávt puátá uáinusân, lii lehâstiđ Edge.
Vijđedum torvolâšvuotâpeividmij ohjelmist toorjâ nohá táálái tiäđui mield roovvâdmáánu 13. peeivi 2026.
Käldeeh:
– Sadat miljoonat läppärit päätyvät kierrätykseen, koska Microsoft lopettaa Windowsin tuen – kuluttajaviranomainen: on ok (yle.fi)
– Microsoft’s Windows 10 Extension Is Now Absolutely Free in Europe (www.pcmag.com)
Kove: Santeri Viinamäki (Wikimedia Commons)