Australiast lii tuhhiittum maailm vuosmuš puáhuttâs, mii syeijee koalaid klamydianjuámumist. Taat tavdâ lii stuorrâ uhke šlaajâ cevzimân, já tot toovât joba pele koalajämimijn. Nubben stuorrâ uhken koalaid já meid eres australialáid elleid láá meccipuáluh, moh tuššâdeh ellei eellimkuávluid. Koalah iälusteh eromâšávt eukalyptusmeecijn Australia nuorttâriddoost.
Klamydia lii koalain táválâš já varâlâš tavdâ, mii puáhtá tovâttiđ kužžâvaaivijd, čalmettesvuođâ, heeđâlmttesvuođâ já loopâst val koala jäämmim. Motomijn nuorttârido eukalyptusmeecijn joba 50–70 prosentist koalain lii klamydianjuámmum.
Sunset Coast ‑ollâopâttuv totkeeh láá porgâm puáhuttâs valmâštem oovdân jo paijeel love ihheed. Puáhuttâs ij vaađâ pehtilittem, mii taha ton kevttim älkkeebin luánduviđá elleid. Ovdil njuámumeh tálhuduvvojii antibiotijgijn, mut toh vahâgittii koalai čuálifloora já tohhii eukalyptus suddâdem váddásubbon. Taat vist tovâttij niälgumijd já koalai jämimijd.
Pirâsminister Murray Watt mield puáhuttâs lii merhâšittee lävkki ovdâskulij koalai suoijâlmist. ”Lii eromâš tehelâš, et mij anneep huolâ puáccám ellein, vâi puáttee suhâpuolvah-uv pyehtih uáiniđ täid áinoošlajâsijd elleid luándust”, sun eeđâi.
Australia haldâttâh lii investistám nyevt 43 miljovn eurod koalai puáhuttâstutkâmân já meid Saving Koalas Fund ‑ruttâráájun. Taat siäđus čuávu koalaid luándust já huksee uđđâsist koalai eellimkuávluid, jis toh láá killám meccipuáluin.
Koalah onnuuškuottii virgálávt uhkevuálásâžžân šlaaijân ive 2022.
Käldee:
– Eerste chlamydiavaccin voor koala’s goedgekeurd in Australië (nos.nl)
Kove: Till Niermann (Wikimedia Commons)