Jo vittâ eennâm – Slovenia, Espanja, Island, Irland já Vuáládâhenâmeh – láá almottâm, et toh iä ááigu uásálistiđ Euroviisuid, jis Israel uásálist toid. Suijân lii Israel viehâváldálâš volliittem Gazan.
Irland vuolgâttâsfinnodâh RTÉ tieđettij ääšist vástuppeeivi čohčâmáánu 12. peeivi. Finnoduv hoovdâ Kevin Bakhurst mielâst Irland ij ane máhđulâžžân uásálistiđ Euroviisuid, jis olmoošjiegâi monâttem juátkoo Gazast. RTÉ lii meid huolâst toimâtteijei morheedmist Gazast, aalmugijkoskâsij toimâtteijei kieldimist puátimist Gazan já kidnappajum ulmui kavhâdis tiileest.
Okko tassaaš Slovenia almolâš vuolgâttâsfinnodâh RTVSLO almottij vuosmužžân enâmin, et tot kiäsádât Euroviisuin, jis Israel ij tom jieš poorgâ. ”Jis mij ep pyevti sooppâđ hiäivulii ohtsâšpargoost, te talle mij ep puáđi”, almottij RTVSLO hovdâ Ksenija Horvat.
Espanja kulttuurminister Ernest Urtasun almottij vuossaargâ iäpádâsâidis: ”Mun jiem osko, et mij pyehtip anneeđ Israel uásálistem táválâžžân tego mihheen eeđijd ij liččiigin”, sun eeđâi.
Meiddei Island vuolgâttâsfinnodâh Ríkisútvarpið (RÚV) já Vuáládâhenâmij AVROTROS tieđettii siämmáá saavâ.
Taan ive 37 enâmid uásálistii Euroviisuid. Táválávt puoh enâmeh kalgeh almottiđ majemustáá roovvâdmáánust, áiguh-uv toh uásálistiđ Euroviisuid vâi iä. Taan tove äigimeeri lii majedum juovlâmáánun.
Eidu tääl EBU, Euroviisui organisaattor, mana čoođâ valmâštâllee savâstâlmijd jyehi uásálistee-enâmáin.
Euroviisuh tuállojeh puáttee ive Wienist, já taid keččih paijeel 160 miljovn olmožid pirrâ maailm. Euroviisuh láá ohtâ stuárráámuin tv-tábáhtusâin ubâ maailmist.
Käldeeh:
– Vier landen dreigen met wegblijven van Songfestival 2026 als Israël deelneemt (nos.nl)
– Nederland doet niet mee aan Songfestival als Israël deelneemt (nos.nl)
Kove: Bildagentur Zolles (Wikimedia Commons)