Majemui aigij tullâpuáluh láá lamaš stuorrâ kikse Maadâ-Euroop já Tuurki luándu- já meccikuávluin. Puálukodeh láá časkâdâm pyelimijd, já časkâdmeh láá-uv iänááš luhostum.
Espanjast já Portugalist láá taan ive puállám kuávluh jo paijeel 70 000 hehtaar verd, ige loppâ lah veltihánnáá uáinusist. Ovdâmerkkân älgee okko kuohtuin enâmijn lii eromâš paahâs, mii paajeeld meccipuálui riiskâ. Tave-Portugalist lii palo tast, et časkâdem vyelni leijee pyelimeh leevvânškyeteh uđđâsist koškáduvâi já korrâ piegâ keežild. Tondiet Portugal virgeulmuuh láá váldám anon pehtilub čuávvum meccipuálui kuáttá. Portugal president sárnu uđâstoimâttâh Lusa mield eromâš vädis ääigist.
Meid Kypros lii kierdâm korrâsávt: tobbeen 13 150 hehtaarid láá puállám algâive. Euroop meccipuálu karttim- já váruttâspalvâlus EFFIS mield Kyprosist láá puállám jyehi ive suullân 2 000 hehtaarid.
Tuhátteh ässeeh Balkan-enâmijn já Italiast láá karttâm evakuistuđ pyelimij keežild. Tuurkist 14 olmožid láá jáámmám vädis časkâdempargoi ohtâvuođâst.
Maaŋgah enâmeh rahttâtteh tääl toos, et pyelimeh sättih cokkâniđ eenâb-uv. Kreikkaast já Italiast tullâpuálui cokkânemriskâ lii tääl eromâš olluv. Kuohtuin enâmijn lii arvam, mut ovdâmerkkân Ateena kuávlust já Italia maadâoosijn riskâ pyelimáid lii eidu tääl eromâš olluv. Pakkâ šooŋah pajedeh meccipuálui riiskâ, eromâšávt talle ko siämmáá ääigi lii meid korrâ pieggâ. Kuškâm šadoh cokkâneh já pyelih älkkeht.
Majemui 20 ive ääigi meccipuáluh láá lasanâm maailmvijđosávt, eromâšávt Eennâmpáálu taavaabeln. Suijân taas lii šoŋŋâdâhnubástus, mon keežild keesih láá koškásuboh ko ovdil. Lasanâm puálui keežild lii meid lamaš tárbu kevttiđ eresmuđusijd tullâpuálui časkâdem- já estimvuovijd ko ovdil. Ovdâmerkkân Espanjast časkâduvvoo tääl täävjib čäsittáá, ovdâmerkkân toin naalijn, et šaddokerdi váldoo ollásávt meddâl já meid nuuvt et jieš cokkit kontrollistum tuulâ.
Käldeeh:
– Natuurbranden in Zuid-Europa en Turkije veelal onder controle, dreiging blijft (nos.nl)
– Portugal: Firefighters cannot be everywhere at same time – official (www.lusa.pt)
– European Forest Fire Information System EFFIS (forest-fire.emergency.copernicus.eu)
Kove: Ronny (Pixabay)