Deb Haaland, kote lii Ovtâstum staatâi haldâttâs vuossâmuš algâaalmugân kullee minister, lii nobdum ive 2025 Chief Standing Bear Prize for Courage -palhâšume uážžon. Palhâšume adeluvvoo ihásávt algâaalmug jesânân, kote čáittá stuorrâ ruokkâdvuođâ pooliitlávt teikâ sosiaallávt. Tom juáhá Chief Standing Bear Project -servi.
Servi vuáđust valjiimis toin naalijn, ete Haaland piergij ekonomâlij vaigâdvuođâiguin ohtuuhuolâtteijen, čođâlditij vuoigâdvuođâtiettuu totkos já leehâi luodâ algâaalmugij jesânáid Ovtâstum staatâi politiikist. Sust šoodâi vuossâmuš algâameriklâš haldâttâsminister, ko president Joe Biden nomâttij suu sisministerin iivij 2021–2025.
– Haaland eellim já jođetteijeevuotâ čäittih ruokkâdvuođâ maaŋgâid haamijd – joskis killeelvuođâ, meritátulâšvuođâ vädisvuođâi oovdâst já haalu jođettiđ, veikâ päälgis ličij epivises, iätá Chief Standing Bear Project haldâttâs saavâjođetteijee Katie Brossy.
Laguna puebloindiaanáid kullee Haaland finnee palhâšume roovvâdmáánu 13. peeivi, kuás Ovtâstum staatâin juhloo Algâaalmugij peivi.
Chief Standing Bear Project vuáđudui ive 2022. Ton ulmen lii kunnijâttiđ ponca-aalmug hoovdâ Standing Bear já suu tuáru aalmuglâšvuoigâdvuođâi peeleest. Standing Bear lâi vuossâmuš algâameriklâš, kote tubdâstui olmožin Ovtâstum staatâi laavâ mield.
Ovdebái iivij palhâšume finnejii čaittâleijee já musikkár Wes Studi (2022), suáldát já politikkár Tom Brewer (2023) sehe tuámmár Diane Humetewa (2024).
Palhâšumán kuleh meetterpele kukkosâš pääcis Standing Bear -hoovdâst já 5 000 dollar ruttâpalhâšume.
Käldeeh:
– Former Interior Secretary to be honored with Chief Standing Bear Prize (nebraskaexaminer.com)
– Deb Haaland oažžu árvvusatnon bálkkašumi (www.nrk.no)
– Standing Bear Prize for Courage (chiefstandingbear.org)
Kove: Deb Haaland (Wikimedia Commons)