Syemmilâš säittišlivgejeijee Pauli Nevala lii jáámmám vástuppeeivi 20.6.2025. Sun lâi 84-ihásâš. Nevala jaamij puácuvuotân, mii ovdánij jotelávt.
Nevala vuoitij säittišlivgim olympiakole ive 1964 Tokiost, kost sun šlivgij 82,66 meetterid. Puáđus lâi mielâttes pyeri, tastko tuše kyehti mánuppaje ovdil olympialij Nevala já suu viljâ láin karttâm autopáártán. Ton keežild Nevala vietij kyehti oho pyecceeviäsust ige puáhtám hárjuttâllâđ nuuvt korrâsávt ko táválávt.
Olympiakole lasseen Nevala vuoitij EM-siilbâ Ateenast ive 1969. Talle suu säitti kiirdij 89,58 meetterid.
Nevala vuoitij meid Suomâ miäštárvuođâ neljii: iivij 1961–1963 já ive 1967.
Nevala ulâttâs lâi 92,64 meetterid, mon sun šlivgij ive 1970 Suomâ–Ruotâ-staatâkištoost. Tot lâi tuše 6 senttimeetter uánihub ko tallaš maailmulâttâs, mon Nevala kištokyeimi Jorma Kinnunen lâi šlivgim ovdebáá ive. Keesi 1970 lâi Nevala pyeremus paje. Talle suu love pyeremuu kišto koskâárvu lâi 90,12.
Nevala karrieer nuuvâi ive 1971 uálgátuáiviváádu keežild.
Käldeeh:
– Pauli Nevala on kuollut (www.iltalehti.fi)
– Keihäänheiton olympiavoittaja Pauli Nevala on kuollut – ”Tuli selväksi, kuka oli kunkku” (yle.fi)
– Keihäslegenda Pauli Nevala on kuollut (www.ts.fi)
Kove: Unknown (Asahi Shinbun) (Wikimedia Commons)