Nato njunoščuákkim tuálloo Vuáládâhenâmijn Haagist kesimáánu 24.–25. peeivi. Čuákkim uárnejuvvoo World Forumist. Vyerdimist lii historjá stuárráámus torvolâšvuotâoperaatio ubâ enâmist. Čavgejum torvotoimáid lii tárbu, tastko kaavpugân puátih paijeel 150 staatâuáiváámussâd já ministerid paijeel 40 enâmist. Vyerdimist láá meid suullân 6 000 delegaatiojesânid já 2 000 toimâtteijed. Orniimeh puátih mäksiđ Vuáládâhenâmáid 183,4 miljovn eurod. Njunoščuákkim tiet motomeh kirdemvuáruh macâttuvvojeh, luodah láá kiddâ, kuávlu kähvivisteh láá kiddâ já tábáhtumeh láá macâttum.
Maailmnjunošeh puátih Vuáládâhenâmáid majebaargâ 24. peeivi. Sii ohjelmist láá talle peivimáláseh eennâm kunâgâssáin Willem-Alexanderáin. Koskoho sij čokkâneh ohtsii čuákkimân.
Njunoščuákkimist Haagist láá meid olgo- já piäluštâsministerij čuákkimeh. Siämmáá ohtâvuođâst uárnejuvvoo konferens viärjuráhtulâšvuođâst, moos äššitobdeeh peesih uásálistiđ. Taat uási lii kuulmâpiäivásâš vuossaargâst koskookon, ađai tot uárnejuvvoo kesimáánu 23.–25. peeivi.
Nato-njunoščuákkim valmâštâlmeh láá pištám ubâ ive, já jyehi uásálistee várás lii rahtum persovnlâš riskâproofiil. Logistiik lii stuorrâ hástu, tastko jyehi kyesi torvolâšvuođâ ferttee turviđ kirdemkiedist hotellân já tobbeen ain čuákkimsajan já siämmáánáál meid maassâd. Peeli Vuáládâheennâm poolisvuoimijn já torvolâšvuođâkoccein láá tai kyevti peeivi ääigi kaavpugist.
Tááláš geopooliitlâš keeldâ lasseet torvolâšvuotâriiskâid. Tondiet Haag áimutile syeijejuvvoo maaŋgânáál. Apeldoorn aldasijn leijee koččomkuávdáást koccoo tääl ubâ eennâm áimutile, já Nato čuákkim keežild kuávdáást láá eenâb pargeeh ko táválávt. Áimuvyeimih tuáimih meid pehtilubbooht. Táválávt enâmist láá F-35-hevâtteijeeh valmâšin, mut tääl láá valdum anon meid Apache-helikoptereh sehe Patriot- já NASAMS-áimutuástumsysteemeh. Taah systeemeh kalgeh visásmittiđ rakkeetvolliittâsâi tuástum.
Njunoščuákkim nohá puohháid koskoho.
Käldeeh:
– NAVO-top Den Haag valt duurder uit, Rijk betaalt zeker 183 miljoen euro (nos.nl)
– Hoe klein of groot, elk land komt met eigen wensenlijstje naar NAVO-top (nos.nl)
Kove: ei6 (Pixabay)