Sri Lanka heivit ijjâjunáidis äigitaavluid vildâelefantij suojâlem keežild. Sri Lanka ryevdikiäinulágádâs tuáivu, et uđđâ äigitavlu iästáččij junáluhottesvuođâid elefantijgijn. Kuovâmáánu loopâst stuorrâ elefantčuurâ paasij luándureservaatist huáppujuná vuálá. Luhottesvuođâ keežild juná skirvânij olgos vyeijimraađeest, já ubâ elefantčuurâ jaamij. Juná mađhâšeijeeh iä ruásnulum luhottesvuođâst.
Sri Lanka media mield oohtânpeeškitmeh elefantijgijn láá čuuvtij lasanâm. Majemui 17 ive ääigi eenâb ko 130 elefanttid láá jáámmám junáluhâttesvuođâin. Taat lii suijân toos, mondiet ryevdikiäinulágádâs váldá anon uđđâ äigitaavluid já keeppid ijjâvuáruid. Tagareh ijjâvuáruh, moh kärttih vyeijiđ meeci čoođâ, kepiduvvojeh eromâšávt eennâm taavaabeln já nuorttiibeln. Eres-uv tooimah tahhojeh: ryevdikiäinui kuorâst miestuuh čuáppojeh, já sajan piäijojeh lase laampuh, vâi junávyeijeeh uáinih pyerebeht elefaantij liihâdmijd. Meccisoojijd puátih meid lihâdemsensoreh, moh äiccih elefaantijd, já rääigih tiävdojeh ryevdirađe kooskâst, vâi elefanteh iä rokkâs raigijd kiddâ. Ijjâlinjáid piäijojeh meid šleđgâjunáh tondiet ko toh orosteh jotelubbooht ko táváliih junáh.
Elefantij meeri Sri Lankast lii kiäppánâm jo kuhháá. Val 1800-lovvoost arvâlui, et enâmist lijjii 14 000 elefanttid. Majemuš rekinistem lii tohhum ive 2019, já uđđâ rekinistmij mield enâmist láá tuše 7 500 elefanttid.
Käldee:
– Minder nachttreinen in Sri Lanka om botsingen met olifanten te voorkomen (nos.nl)
Kove: Suhridam (Wikimedia Commons)