Säämimuseo Siida puávdee sämisiärvus mieldi valjiđ tiiŋgâid vuáđučáitáldâhân. Museo väljee sämmilâštiiŋgâid Siida vuáđučáitálduv siärvusvitriinân oovtâst siärvusáin. Taan tove uáinusân peesih Tave-Pohjanmaa museo skeŋkkim sämitiiŋgah, moh kuleh Samuli Paulaharju čáitáldâhân. Mij molsop siärvusvitriin tiiŋgâid huolâttâspuudâ ääigi vyesimáánust 2025.
Tave-Pohjanmaa museo skeŋkkij säminurâlduvâs, ohtsis 370 tiŋgâd, Säämimuseo Siidan ive 2024. Nurâlduv nuurâi oululâš aalmugtiettee já museohoittájeijee Samuli Paulaharju (1875–1944). Nurâldâh ana sistees jieškote-uvlágánijd tiiŋgâid Säämist sierâ äigipoojijn, eereeb iärrás härvinâš verditaavgij pecihijd. Puárásumos tain lii ivveest 1730. Taan ive Samuli Paulaharju šoddâmist láá kuullâm 150 ihheed, já tääl jotonpieijum tiiŋgâi valjim Siida vuáđučáitálduv siärvusvitriinân oovdânpuáhtá suu merhâšittee pargo sämitiiŋgâi nurâmist.
Siida ”Enâmeh láá mii párnááh – Nämä maat ovat lapsiamme” -vuáđučáitálduv siärvusvitriinist láá tääl uáinusist Suomâ aalmuglâšmuseost macâttum sämitiiŋgah, moh láá väljejum toos siärvuslávt Siida vuáđučáitáldâhuđâsmittem ohtâvuođâst iivij 2021–2022. Vitriin tiiŋgâid lii tárguttâs molsođ merikoskâsávt, já tiiŋgah väljejuvvojeh ain oovtâst sämisiärvusáin.
Tiiŋgah väljejuvvojeh siärvusvitriinân káidus- já hybridtilálâšvuođâin. Káidusteivâdmeh olášuttojeh Teamsáin. Tain tiiŋgah oovdânpuáhtojeh älkkeht Säämimuseo Finna-siijđoi peht (siida.finna.fi).
– Vu 10.2. tme 17:00 Teams-teivâdem, mast oovdânpuáhtojeh tähti- já čuárvitiiŋgah
– Vu 17.2. tme 17:00 Teams-teivâdem, mast oovdânpuáhtojeh nähki- já čevđitiiŋgah
– Vu 24.2. tme 17:00 Teams-teivâdem, mast oovdânpuáhtojeh tekstiilijd
– Vu 10.3. tme 17:00 Teams-teivâdem, mast oovdânpuáhtojeh nuorttâsämmiliih tekstiileh
– Vu 17.3. tme 17:00 Hybridtilálâšvuotâ Siida siärvuslii saajeest, mast oovdânpuáhtojeh muorâtiiŋgah.
Saje stuárudâh räijee uásálistei mere, já tondiet Siida táttu uásálisteid almottâttâđ siärvuspargovästideijee Pia Nikulan majemustáá tuorâstuv 13.3.2025.
Tilálâšvuođah láá suomâkielâliih. Tilálâšvuođâi Teams-liiŋkah kávnojeh Säämimuseo Siida nettisiijđoin já sosiaallii media kanavain.
Tiervâpuáttim fáárun valjiđ tiiŋgâid já vaiguttiđ Siida vuáđučáitálduv siskáldâssáid.
Lasetiäđuh: Siärvuspargovästideijee Pia Nikula, pia.nikula@samimuseum.fi, p. 040 621 2663
Amanuens, nurâlduvah Marjo-Riitta Rantamäki, marjo-riitta.rantamaki@samimuseum.fi, p. 040 571 5670
Säämimuseo Siida
Kove: Rauno Koivunen, Säämimuseo Siida