Yle Sáámán usâškyeteh forgâpalij uđđâ hoovdâ. Yle Säämi tááláš hovdâ Maiju Saijets lii ciälkkám jieijâs luovâs pargostis cuáŋuimáánu rääjist. Sun lii lamaš uáppuluámust vyesimáánu 2024 rääjist.
– Muu náguskirjepargo lii tääl vuálgám pyereest joton, já jis mun kolgâččim maccâđ ubâpiäiválii paargon taan muddoost, te jiem kiergâniččii porgâđ tain. Jis taat tääl pásáččij koskân, te mun jiem osko, et puávtáččim maccâđ taas innig, iätá Saijets.
Náguskirjestis sun totká paijeel 65-ihásij sämikielâlij ulmui medialuuhâmtááiđu já maht ton ahasiih ulmuuh kevttih, pyevtitteh já árvušteleh sämikielâlii mediasiskáldâs sehe maht sij kevttih ubânâssân media.
Pargoalmottâs kávnoo forgâ Yle siijđoin
Yle uđđâsij já valastâllâm operatiivlâš hovdâ Alex Fager muštâl, et uđđâ hoovdâ rekrytistem álgá nuuvt jotelávt ko máhđulâš.
– Aaibâs čuávuvái peeivij mij algâttep rekrytistem. Mij uuccâp uđđâ hoovdâ, kote lii siämmáá ääigi meid sämikielâlijn siskáldâsâin västideijee toimâtteijee. Mij uuccâp čepis sämikielâlii journalist, iätá Fager.
Västideijee toimâtteijee västid Yle puoh sämikielâlijn siskáldâsâin. Fager muštâl, et pargoalmottâs kávnoo forgâ Yle sijđoin já et äigitavlu lii uáli jotteel.
Yle nubástusráđádâlmeh iä vaiguttâm sämikielâláid toimáid
Yle kieskâd nuuhâm nubástusráđádâlmeh iä vaiguttâm sämikielâláid uđâs- já äigikyevdilis toimáid, muštâl operâtiivlâš hovdâ Alex Fager.
Yle ruttâdem kieđâvuššâm parlamentaarlâš pargojuávkku meridij čohčâmáánust stuárráámuin šiäštuin Yle 100-ihásii historjást. Šiäštui tiet Ylest uárnejii Suomâ mediasyergi stuárráámuid nubástusráđádâlmijd. Ráđádâlmij puáđusin Ylest vyelgih 309 parged, já sist 156 ciälkkojeh luovâs pargoost.
– Sämikielâlâš toimâttâs ij lamaš mieldi ráđádâlmijn já pargo juátkoo tegu ovdil-uv. Mij halijdijm visásmittiđ taan pargo jotkum, iätá Fager.
Sáárá Keränen
Käldee:
– Yle Sápmái ohcet ođđa hoavdda – Maiju Saijets lea cealkán iežas eret (yle.fi)
Kove: Saku Heinänen (Wikimedia Commons)