Anarâškielâ servi almoot uuccâmnáál oovtâ kesitoimâtteijee saje kesi-syeinimáánun. Pargon lii uđđâsij já eres čallui čäällim Anarâš aavisân. Uđđâseh kieđâvušeh puohlágánijd teemaid. Aavis uđđâseh juáhhojeh tagaráid kategoriaid ko aalmugijkoskâsiih uđđâseh, ekonomia, kielâ, kulttuur, páiháliih uđđâseh, politiik, Suomâ, tieđâ, ulmuuh já valastâllâm. Uđđâsij čäällim lasseen pargokován kuleh meiddei sahhiittâlmeh sehe blogičalluuh. Anarâš aavisist láá nelji blogi: Aanaar argâ -blogi, kielâblogi, kođđeemblogi já luándublogi. Aavis almostit ucemustáá vittâ čalluu ohhoost.
Kesipargee puáhtá jieš iävtuttiđ, kuás sun haalijd porgâđ kesi-syeinimáánust. Pargoäigi lii 100 tijmed, já pargoääigist suáppoo tärhibeht njunoštoimâtteijein. Kesitoimâtteijest váttoo šiev čäällimmáttu. Vátámuššân láá čođâldittum vuáđu-uápuh já ¾ amnâsuápuin Giellagas-instituutist.
Jis kesitoimâtteijee pargo kiäsut tuu, te vuolgât jieijâd CV, listo čođâldittum kuursâin Oulu ollâopâttuvâst já jieijâd čäällim uđâsteevstâ teikâ mottoom eres teevstâ anarâškielân (250–300 säännid) seervi mediapargei čujottâsân fabrizio.brecciaroli@gmail.com majemustáá 15.3.2025.
Kove: Monoar Rahman Rony (Pixabay)