Anarâškielâ siärvádâh lii uážžum tehálii tubdâstus, ko Wikimedia-siäđus lii tuhhiittâm anarâškielâlij wikipedistei kevtteejuávhu ive kukkosii iskosááigán. Anarâškielâ lii vuossâmuš sämikielâ, mii lii uážžum jieijâs Wikimedia-kevtteejuávhu.
Uđđâ ”Inari Saami Wikimedians User Group” -juávkku tuárju anarâškielâlii Wikipedia já eres-uv Wikimedia-projektij ovdedem. Siämmást tot naanood uccâ já uhkevuálásii kielâ sajattuv digitaallii maailmist.
Juávhu vuáđudem tuáváást lii siärváduv kielâiäláskittempargo, vâi anarâškielâ siäiluččij já ličij eenâb uáinimnáál meiddei aalmugijkoskâsii tääsist. Iskospaje ääigi ulmen lii lasettiđ uđđâ siskáldâs anarâškielâlii Wikipedian, pyerediđ puáris artikkâlijd já hokâttâllâđ fáárun uđđâ čälleid já lohheid.
Tot, et anarâškielâst lii tääl jieijâs Wikimedia-kevtteejuávkku, fáálá pyerebijd máhđulâšvuođâid orniđ škovliimijd, tábáhtusâid já ohtsâšpargohaavâid eres kielâucceeblovoiguin já Wikimedia-projektijguin.
Anarâškielâ kulá maailm kulttuurlii áárbán, já tondiet lii tehálâš, et kielâsiärváduvâst lii jieijâs saje meiddei neetist, kost ain eenâb já eenâb ulmuuh uáppih, viestâdeh já jyehih tiäđuid.
Ive kukkosii iskosääigi maŋa Wikimedia-siäđus árvuštâl juávhu tooimâ já ton vaikuttâs siärvádâhân já kielâkuávlun. Jis puátuseh láá positiivliih, te ”Inari Saami Wikimedians User Group” -juávkku šadda fastâ Wikimedia-kevtteejuávkkun.
Puoh anarâškielâ sárnooh láá tiervâpuáttám fáárun. Lasetiäđuh kevtteejuávhust já tast, maht toos puáhtá servâđ, kávnojeh kevtteejuávhu siijđost.
Käldee:
– Affiliations Committee/Resolutions/2024/Recognition of Inari Saami Wikimedians User Group (meta.wikimedia.org)
Kove: Fabrizio Brecciaroli