Artemis II ‑missio mánudâšrakkeet lii sirdum pääččimsajasis pasepeivi-iiđeed NASA Kennedy komovuotâkuávdáást. Rakkeet sirdui 6,5 kilomeetter määđhi, já sirdemoperaatio piištij 12 tijmed. Megarakkeet paijaan 98 meetter alodâhân, já tot tiäddá puoh osijgijn já puáldámuššáin 2 600 tonnid ađai suullân 2,6 miljovn kiilud. Meid Euroopist lii lamaš noonâ roolâ taan rakkeet huksiimist, tastko Euroop komovuotâornijdume ESA já ton tutkâmkuávdáš ESTEC láá västidâm vuárkkámooduul huksiimist.
Vyelgimlaasâ Artemis II -mánudâšmissio várás lekkâs kuovâmáánu 6. peeivi, ađai taat peivi lii vuosmuš máhđulâš äigi rakkeet päčimân, jis puoh valmâštâlmeh maneh vuárdámušâi mield. Siämmáá ohhoost láá motomeh eres-uv pääččimmáhđulâšvuođah kuovâmáánu 10. peeivi räi. Vâi pääččim luhostuvá, talle šoŋŋâ kalga leđe päčimân hiäivulâš já puoh testaameh kalgeh moonnâđ pyereest. Kuovâmáánu 10. peeivi maŋa kuulmâ ookon ij lah máhđulâš pääččiđ rakkeet, jis vuolgâ ij mottoom suujâ tiet luhostuuččiigin vuosmuu vyelgimlaasâst.
Ovdil pääččimlaasâ lekkâsem NASA lopâttâl rakkeet vuolgâvalmâštâlmijd teikâ táárbu mield sirdá rakkeet maassâd stuorrâ rakkeethaalin (Vehicle Assembly Building) lasepargoi várás.
Kirdemmissio stivrimtiimi meerrid Artemis II ‑rakkeet päčimist. Miärádâs tahhoo ton maŋa ko rakettân lii tohhum nuuvt kočodum njuoskâ testâ, ko pääččim infrastruktuur lii testajum já ko astronauteh já operationaallâš tiimi láá valmâšeh. Njuoskâ teestâ ääigi rakkeet taŋkkajuvvoo já tastoo puáldámuš vuod njammoo olgos. Taan testam ääigi tahhoo meid vyelgimrekinistem, mii loppâloopâst orostittoo. Njuoskâ teestâst astronauteh iä lah siste rakettist, mut sij čuávuh kale puoh teestâid.
Artemis-ohjelmist NASA vuolgât astronautijd Mánudâžân tutkâm já ekonomisij hiäđui tiet sehe tondiet, et Mánudâžân huksejuvvoo puátteevuođâst mánudâštoimâsaje vuosmui almaidittum Mars-missioi várás.
Artemis II ij vala siäivu Mánudáá asan, pic tot kirdá Mánudáá pirrâ. Esken Artemis III siäivu Mánudâžân.
Artemis II ‑missio pištá 10 peivid. Máátkán vyelgih nelji astronaut: komendeijee Reid Wiseman, kirdee Victor Glover, missiospesialist Christina H. Koch já missiospesialist Jeremy Hansen. Majemuu tove olmooš eelij Mánudáást 54 ihheed tassaaš. Kuttii olmooš lii siäivum Mánudáá asan. Taan räi olmooškode historjást tuše 12 olmožid láá vázzám Mánudáá asseest.
Käldeeh:
– ’We’re ready to go,’ Nasa crew say as rocket inches closer to launch pad (www.bbc.com)
– NASA’s Artemis II Live Views from Kennedy Space Center (www.youtube.com / NASA)
Kove: Nasa YouTube (Wikimedia Commons)