Suomâ nuorâ luákkánjuškejeijeeh já ovtâstittum čuoigâm valastâlleeh piergejii mielâttes pyereest nuorâi Tave-enâmij miäštárvuotâkištoin, moh uárnejuvvojii Ruotâ Falunist uđđâivemáánu 16.–18. peeivi. Suomâ lâi kištoi pyeremus eennâm, já syemmiliih vuoittii ohtsis 14 mitalid: nelji kole, nelji siilbâ já kuttâ proonsi. Kištoin kištottellii vuálá 20‑ihásiih nieidah/nisoneh já vuálá 18‑ihásiih kaandah/almaah, kiäh pottii čiččâm enâmist adai meid Tave-enâmij ulguubeln.
Käävci mitalid Suomân lekkâmpeeivi
Vástuppeeivi 16.1. nieidâi K90‑luáhást Siilinjärvi Ponnistus Mette Korhonen já Puijo Hiihtoseura Saara Ihantola vuoittijn proonsi siämmái čuággáiguin. Kole vuoitij taažâ Kristiane Thuen Tyrom.
Kaandâi luákkákištoost viiđâ pyeremuu njuškejeijee juávhust lijjii nelji syemmilii. Kole Suomâ ij liijká vuáittám, mutâ siilbân ulâttij Jyväskylä Hiihtoseura Pyry Kykkänen já proonsin vist Helsig Mäkihyppääjät Andreas Helanne. Niäljádin poođij Lahti Hiihtoseura Pyry Keskinen, viđâdin Siilinjärvi Ponnistus Veeti Hyvärinen.
Nieidâi 5 km ovtâstittum čuoigâmist Mette Korhonen vuoitij kole já Saara Ihantola siilbâ. Suomâ finnij kyehti miitaal meiddei kaandâi 7,5 km ovtâstittum čuoigâmist. Viktor Ervik Aune riäivái siilbâ, Marcus Kääriäinen vist proonsi.
Vittâ miitaal juávkkukištoin lávurduv
Nieidâi juávkkuluákkánjuškiimist Saara Ihantola já Mette Korhonen vuoittijn jo kuálmád mitalis ko suoi njuškijn vuáitun 16 čuággá iäroin Taažân, mii poođij nubben. Kaandâi juávkkuluákkákištoost Suomâ njunošjuávkku (Andreas Helanne já Pyry Kykkänen) ulâttij siilbân, já nubbe juávkku (Veeti Hyvärinen já Pyry Keskinen) puovtij pááikán proonsi.
Mitaleh pottii meid ovtâstittum parâviestâčuoigâmist. Nieidâi njunošjuávkku vuoitij kole, kaandâi njunošjuávkku finnij proonsi.
Siähálâs juávhui kišto pasepeeivi
Pasepeeivi áinoo šlaajâ lâi luákkánjuškim siähálâs juávhui kišto. Suomâ njunošjuávkku (Mette Korhonen já Pyry Kykkänen) poođij nubben Ovtâstum staatâi maŋa. Suomâst šoodâi kuittâg Tave-enâmij miäštár, tastko Ovtâstum staatah kištottâl Tave-enâmij miäštárvuotâáárvu (TM-áárvu) ulguubeln.
Siilbâ vuoitij Taažâ njunošjuávkku, mii finnij paijeel 20 čyegisid ucceeb ko Suomâ. Suomâ nubbe juávkku (Saara Ihantola já Andreas Helanne) poođij viđâdin já kuálmád juávkku (Iida Salmi já Pyry Keskinen) kuđâdin.
”Šiev pargo ubâ oholoopâ”
Juávhu välmejeijeeh láin Olli Muotka já Janne Korhonen. Muotka lâi tuđâvâš nuorâ valastâllei paargon.
– Valastâlleeh čođâldittii kištoid juávkkun eidu nuuvt tego kolgâččij-uv, šiev pargo ubâ oholoopâ. Mij lâim Taažáin kištottâlmin miitaalsoojijn täsivávt, já mitaleh monnii-uv kuohtuid, mutâ ohtsâščuággái mield mij lâim ucánjáhháá pyerebeh. Kaandâi tääsi luáhást ovdán taan aheluoka äigitaavlu miäldásávt, já nieidâi noonâ porgâm nuuvt luáhást já saaveehlättee alne lâi čoovdâäšši miänástusân, Muotka muštâl.
Käldee:
– Suomi rohmusi 14 mitalia ja oli paras maa mäkihypyn ja yhdistetyn nuorten PM-kilpailuissa Falunissa (hiihtoliitto.fi)
Kove: Suomâ Čuoigâmlitto