Ko Egil Pedersen pajasšoodâi sämisiijdâst Tave-Taažâst 1980- já 1990-lovoin, suu mielâst oroi, et sun ij kuulâ kuussân. Távjá sust lâi tobdo, et sun ij tuhhim vááijuvlii kielâmáátus tiet. Sämisiärváduv ulguubeln vist sun feerij rasistlii viehâvääldi.
Tääl Pedersen lii 47-ihásâš. Ko sunjin šoodâi máhđulâšvuotâ rähtiđ jieijâs elleekove, sun meridij rähtiđ taggaar elleekove, mii ličij išedâm suu tubdâđ ucceeb ohtuuvuođâ párnážin. Tast šoodâi Biru Unjárga -elleekove.
Elleekove uáivipersovn lii nubálovihásâš Elvira. Ton maŋa ko sunjin muštâluvvoo, et sun šohânij tanskalii heeđâlmlâšvuotâklinik peht, sun kuvâttâl, et suu eeči sáttá leđe tanskalâš Game of Thrones -täsni Nikolaj Coster-Waldau. Talle ko suu eeči paifakkist itá já Elvira uážžu tiettiđ, et sun tuođâi-uv lii sämmilâš, sun vuálgá máátkán kavnâđ jieijâs identiteet.
Jis tágáreh elleekoveh liččii lamaš jo talle ko Pedersen rávásmij, te sun osko, et sun ličij puáhtám tuhhiittiđ jieijâs identiteet jo tooleeb. ”Mun jurdám meid, et liččim jurdâččâm, et jáá, láá eres-uv ulmuuh tego mun. Veikkâ elleekove uáivipersovn lii-uv nieidâ, te mun identifisistuuččim suin aainâs-uv uásild, jiemge oroččii jieččân nuuvt ohtuunis maailmist”, sun iätá.
Pedersen tuáivu, et elleekove huumor puáhtá koccááttiđ savâstâllâm. ”Mun tuáivum, et huumor addel keččeid máhđulâšvuođâ savâstâllâđ identiteetist já kuáhtáđ jieijâs jurduid identiteetist.”
Aalmugijkoskâsii sämielleekoveinstituut toimâttâshovdâ Anne Lajla Utsi muštâl, et Biru Unjárga meerhâš ennuv sämielleekován já kulttuurân vijđásubbooht. ”Taat lii vuossâmuš tove ko kuhes elleekooveest mii nuorah láá mainâs kuávdáást. Mii nuorâ suhâpuolvâin lii tárbu uáiniđ jieijâs, jieijâs mainâsijd já jieijâs kielâid spejâlistum elleekooveest, tastko tot čáittá sehe olssis já maailmân, et mij lep ain tääbbin, já mii oromist maailmist lii árvu.”
Utsi juátká, et lii tehálâš, et elleekoveh tego Biru Unjárga uáinojeh pirrâ maailm. ”Tot čáittá sämmilij já algâaalmugij mainâsij tehálâšvuođâ aalmugijkoskâsii ohtâvuođâst sehe tom, mon tehálâš lii, et mij peessâp muštâliđ jieččân mainâsijd jieččân uáinust.”
Sarah Olaussen Eira čaittâl Elvira Biru Unjárga -elleekooveest. Sun ij lah kuássin ovdil toimâm čaittâleijen, pic vuolgij iskosčaittâlmân hitruuvuođâ tiet. 17-ihásâš Eira jotá vala škoovlâ, kost sun lohá muusik. Sun muštâl, et sun lii lijkkum čaittâlmân, já tuáivu, et sun puávtáččij čaittâliđ eenâb puátteevuođâst.
”Maaŋgah nuorah láá kijttevááh, et sist lii viijmâg-uv säminuorâelleekove, moin sij sättih identifisistiđ jieijâs moinnii naalijn. Elleekooveest uáinoo aibâšem irâttiđ leđe miinii, mii ij lah, já loppâloopâst ferttee tuhhiittiđ tom, kii lii. Mun lam uáli jo kijttevâš leđe uási tast”, Eira iätá.
Eira tuáivu, et elleekove iššeed sämmilijd tubdâđ čiävláávuođâ jieijâs sämi-identiteetist. ”Mun tiäđám, et Taažâst maŋgâsist lii lamaš vaigâd tubdâđ čiävláávuođâ tast, et lii sämmilâš. Mun tuáivum, et nuorah, kiäh pajasšaddeh sämmilâžžân, teikkâ ulmuuh, kiäh väldih maassâd jieijâs sämi-identiteet, puávtáččii viijmâg-uv leđe čiävlááh tast, kiäh sij láá.”
Biru Unjárga -elleekove maailmvuosâeehid lâi Toronto elleekovefestivaalist čohčâmáánust. Elleekove almostui Taažâst čohčâmáánu 27. peeivi. Elleekove pargojuávkku tuáivu, et Biru Unjárga almostuuččij maŋeláá eres-uv Tave-enâmijn sehe pirrâ maailm.
Käldee:
– ‘A struggle to feel pride’: coming-of-age film breaks new ground in Sámi culture (www.theguardian.com)
Kove: MasterTux (Pixabay)