Aanaar Juvduuväärist uárnejuvvojii čuoigâm SM‑kištoh cuáŋuimáánu 10.–12. peeivi. Kaskoo čuoigâmjuuhlij Anarâš aavis toimâtteijeeh Valtteri Valkeapolku já Henna Tervaniemi teiváin Aanaar kieldâ čuovviittâshovdáin Ilkka Korhosáin já rijjâäigičällein Tuija Mikkosáin.
Mon mielâst kieldâ ovdâsteijeeh láin tast, ete tágáreh tábáhtumeh ko čuoigâm SM‑kištoh uárnejuvvojeh Anarist?
– Kalehân tast lii stuorrâ merhâšume uccâ párnáid, sehe škovlâláid já peivikiäččuahasáid, ete sij peesih fáárun tábáhtumemiänun já uáinih, maht tábáhtumeh uárnejuvvojeh. Ete toh iä šoodâ jiešmeidlist, peic taid ferttee leđe orniimin. Tääbbin uáiná uápisulmuid uárnejeijen, te máhđulávt tot máttát toos, ete mottoom peeivi jieš‑uv lii orniimin tábáhtuumijd, Ilkka Korhonen muštâlij.
– Iäge mist lah kieldâst taan tääsi tábáhtumeh maŋgii ivveest iäge ubâ jyehi ivegin. Nuuvt ete ko tágáreh uárnejuvvojeh, te kale mij kolgâp anneeđ tom ävkkin nuuvt pyereest ko máhđulâš já pyehtiđ puohahasijd keččâđ kištoid, Tuija Mikkonen eeđâi.
Aanaar kieldâ tiävdá taaijuv 150 ihheed, já tot lâi pyereest uáinusist meid kištoin. Lii-uv taat pyeri mááinus Anarân?
– Joo aaibâs absoluutlávt. Taat lii vissásávt ohtâ mii stuárráámuin ohtsâštábáhtuumijn, mii lohtâs juhleihán. [Taat] lii tehálâš tábáhtume já suotâs äšši, ete mij finnijm SM‑čuoigâmijd taan 150‑juhleihán, Mikkonen ilodij.
– Aanaar 150‑juhleihe lii puoh kieldâláid jieškote-uvnáál merhâšittee äšši. Lii suotâs juhlođ tom sehe Aanaar já ulguubeln puáttee ulmuiguin. Ton áánsust ulmuuh kiddejeh huámášume mii kieldân já kiddiistuveh tast. Kiitiätá kiinii finnee taggaar jurduu, ete teehinhân puávtáččij puáttiđ veikâ paargon-uv, Korhonen eeđâi.
Kieldâ lii huolâstum párnái já nuorâi liihâdhánnáávuođâst. Maggaar merhâšume talle stuorrâ valastâllâmkištoin lii tiervâsláid eellimvuovvijd?
– Lii suotâs, ete mist láá tágáreh syemmiliih njunoščyeigeeh tääbbin. Sij tuáimih ovdâmerkkân mii párnáid já tuáivu mield movtijditteh sii lihâdiđ já jurdâččiđ, ete njunošvalastâllâm-uv puávtáččij leđe ohtâ valjim, Mikkonen muštâlij.
Korhonen: Macâttâs kištoin lii lamaš positiivlâš
Anarâš aavis juuvsâi Ilkka Korhosii vala cuáŋuimáánu loopâst já koijâdij, maht kištoh suu mielâst monnii.
– Kištoh monnii eromâš pyereest. Toh lijjii šiev mááinus meiddei Anarân já Aanaar kuávlun sehe puoh mii tuáimeid.
Korhosii mield Aanaar lii finnim kištoin tuše positiivlii macâttâs. Sun uáiná, ete Aanaar lii ain šiev iävtukkâs kištoid.
– Jis mij uuccâp kištoi ornim puátteevuođâst, te vissásávt mij finnip ruánáá čuovâ. Puohháid paasij positiivlâš tobdo tast, ete kištoid pasta orniđ tääbbin já vala maŋeskiiđâ.
Kove: Valtteri Valkeapolku