De! 2 -haahâ oovded sämikielâlii já sämikulttuur miäldásii nuorâipargo sämikuávlu kieldâin. Haavâ ohtsâšpargokyeimin sämikuávlu kieldâi lasseen láá Säämi máttááttâskuávdáš já Nuorâikuávdáš Vasatokka.
Keesi ääigi haahâ olášutij koijâdâllâm, mon ulmen lâi karttiđ nuorâi tuoivuid sämikielâlii astoäigitooimâ háárán. Koijâdâllâm puátusij vuáđuld nuorah halijdeh eromâšávt sämikielâlijd nuorâiehidijd já oovtâst orroom eres säminuorâiguin. Ton lasseen stuárráámus uási västideijein tuáivuh, ete toimâ uárnejuuččij sii jieijâs päikkisiijdâst.
– Koijâdâllâm vuáđuld nuorah tuáivuh oovtâst orroom eres säminuorâiguin sehe saje, kost teivâđ skipárijguin. Koijâdâlmân västidii 97 nuorrâd, mii lii uáli jo pyeri. Mij viggâp haavâst västidiđ nuorâi tuoivuid, nuuvt ete nuorâin ličij älkkee uásálistiđ tooimân, muštâl haavâ proojeektpargee Anni Saara Aikio.
De! 2 -haahâ lii čoovčâ ääigi vuálgám ucebáid sijdáid, já toimâ lii uárnejum taan räi Vuáčust, Käresavonist já Čevetjäävrist.
– Roovvâd- já skammâmáánust toimâ uárnejuvvoo vijđáht pirrâ sämikuávlu. Puátimin láá eereeb iärrás spellâmehideh, tulâstâllâm já olgonlihâdem. Ton lasseen ohtsâšpargoost Jottee Tyeji -havváin uárnejuvvoo Avelist riessâmkurssâ. Vuávámnáál lii meiddei mokke Kárášjuuvâ já Kuovdâkiäinu tyejimarkkânáid, muštâl Aikio.
Sämitige nuorâirääđi lii finnim nuorâipargo ovdedemhaahân 46 500 € ruttâdem Laapi Kuávluhaldâttâhvirgáduvâst. Haavâ tooimâ puáhtá čuávvuđ sosiaallii mediast haavâ Instagram-siijđoin @de_astoaiggedoaibma.
Käldee:
– Säminuorah tuáivuh oovtâst orroom já sämikielâlii tooimâ – De! 2 -haavâ koijâdâllâm vievâst kärttejuvvojii nuorâi tuoivuuh astoäigitooimâst (samediggi.fi)
Kove: Eeva Mäkinen / Sämitigge