38-ihásâš Rafael Nadal almottij moonnâm ohhoost, et sun áigu joskâd tennisáin. Suu majemuš turnam láá Davis Cup finaleh, moh uárnejuvvojeh skammâmáánu 19.–24. peeivi 2024 Malagast, Espanjast.
Karrieeris ääigi Nadal lii vuáittám 92 turnamid kuáhtásspeelâst: 22 Grand Slam -turnamid, 36 ATP Masters 1000 -turnamid, 23 ATP 500 -turnamid já 10 ATP 250 -turnamid. Ton lasseen sun vuoitij kollemiitaal Peking kesiolympialijn ive 2008. Sun lii vuáittám meiddei 11 turnamid niäljásspeelâst. Tain ohtâ lii kollemiitaal oovtâst Marc Lopézáin Rio de Janeiro kesiolympialijn ive 2016.
Rafael Nadal lii tobdos ”massakiedij kunâgâssân”, tastko stuárráámus uási suu turnamvuáituin láá puáttám massakiedi alne, já sun lii vuáttám maŋgii puoh tehálijd massakiedditurnaamijd: Roland Garros (Grand Slam) 14 kerdid, Monte Carlo (ATP Masters 1000) 11 kerdid, Rooma (ATP Masters 1000) 10 kerdid já Barcelona (ATP 500) 12 kerdid.
Nadal maacâi spellâmkieddijd uđđivemáánust ive puudâ maŋa, kuás sust čuopâdui čuárvitähti. Čuopâdâs maŋa sun lii porgâm ennuv maassâdpeessâm oovdân, já suu ulmen lii lamaš spellâđ uđđâsist pyeremuu täsistis. Tot ij kuittâg luhostum jieškote-uvlágánij váádui keežild.
Keessiv Nadal speelâi muáddi turnam massakiedij alne já uásálistij meiddei kesiolympialáid Pariisist. Pyeremus puáđus lii lamaš Swedish Open -turnaamist Båstadist, kost sun peesâi finalân. Finalist Nadal táppái Nuno Borgesân 3–6, 2–6.
Käldeeh:
– Tennis legend Nadal to retire in November (www.bbc.com)
– Rafael Nadal (www.atptour.com)
Kove: Carine06 from UK (Wikimedia Commons)