Ive 2024 Davis Cup niäljádâsfinaleh, semifinaleh já fiinaal spiällojii Malagast, Espanjast skammâmáánu 19.–24. peeivi. Toh láá nuuvt kočodum kočâttemspeelah, ađai jyehi juávkku spiällá tuše oovtâ juávhu vuástá: vyeittee piäsá ovdâskulij, já táppájeijee kačča meddâl Davis Cupist.
Niäljádâsfinalijn lijjii fáárust Kanada, Ovtâstum Staatah, Argentiina, Italia, Vuáládâhenâmeh, Saksa, Espanja já Australia. Niäljádâsfinaleh spiällojii skammâmáánu 19.–21. peeivi: Italia vuoitij Argentiina 2–1, Australia vuoitij Ovtâstum staatâid 2–1, Saksa vuoitij Kanada 2–0 já Vuáládâhenâmeh vuoittii Espanja 2–1. Pelifinalijn Vuáládâhenâmeh vuoittii Saksa 2–0 skammâmáánu 22. peeivi, já Italia vuoitij Australia 2–0 čuávuváá peeivi. Italia já Vuáládâhenâmeh pessii finalân.
Fiinaal spellui skammâmáánu 24. peeivi. Vuossâmuu speelâst kuáhtáin Matteo Berrettini (ITA) já Botic van de Zandschulp (NED). Berrettini vuoitij speelâ 6–4, 6–2. Nube speelâst vist kuáhtáin Jannik Sinner (ITA) já Tallon Griekspoor (NED). Aalgâst spellâ lâi uáli jo čoovgâs, mut loppâloopâst italialâš spellee vuoitij tom 7–6 (7–2), 6–2.
Italia lâi vuáittám Davis Cup meiddei ive 2023. Talle finalist tot vuoitij Australia 2–0.
Käldee:
Kove: formultiples (Pixabay)