Nuorttâ-Sisilia tevdui koovjâin majebaargâ, tastko Euroop stuárráámus aktiivlâš tullâvääri Etna rusoi suullân käävci kilomeetterid ollâ kovjâpoolvâ Sisilia oolâ. Kovjâ laavdâi pirrâ Etna kuávlu, meiddei Catania kaavpugân. Catania kirdemkieddi lâi kiddâ muáddi tiijme tondiet ko sehe kirdemkieddi já kirdemmašineh lijjii kovjâlovduu vyelni. Kiedi čurgim aalgij tállán ko tullâvääri rávhudij já kovjâpolvâ lappui. Kirdemkieddi lâi oppeet toimâmin jo ehidist siämmáá peeivi. Catania kirdemkieddi lii Sisilia stuárráámus kirdemkieddi. Tot lâi kiddejum Etna russoom tiet jo syeinimáánu aalgâst.
Etna lii russoom aktiivlávt majemui 500 000 ive ääigi. Páiháliih ulmuuh čallii vuosmuu tove Etna rusomist 2 700 ihheed tassaaš. Etnast láá lamaš sehe äävhih já hááituh historjá ääigi. Kovjâ pehtilist kuávlu eennâmtuálu, mutâ laavavirdeh láá motomin tuššâdâm oles siijdâid. Kreikkalii já roomalii mytologiast tuulâ immeel, Hefaistos, rävdijâš tullâvääri vyelni. Etna šoodâi Unesco maailmärbičuosâttâhhân ive 2013.
Käldeeh:
– Euroopan suurin toimiva tulivuori purkautui – useita lentoja peruttu (yle.fi)
– Tulivuori Etna purkautui – Catanian lentokenttä avattu uudelleen (www.hs.fi)
– Mount Etna (www.sicilyactive.com)
Kove: WikiImages (Pixabay)