Maadâ-Euroop pijnedeh viijđes meccipuáluh maaŋgâ enâmist. Eromâš vädis tile lii Ranskaast já Espanjast, kost koškáduvah, pakkâseh já korrâ piegah láá toohâm časkâdempargoid vädisin. Viijđes meecih láá puállám kunnân já páguttâm virgeomâháid evakuistiđ ässeid.
Vuossaargâ čyeđeh puálualmaah láá karttâm časkâdškyettiđ stuorrâ meccipuálu Pariisi maadânuorttiibeln Ranskaast. Tullâ lii levânâm jotelávt koškes šadolâšvuođâ keežild, já viijđes eennâm- já áimučaskâdmeh láá joođoost. Virgeomâhááh láá avžum ulmuid pissoođ meddâl pyellimkuávlui aldasijn. Piäiváškiäinu A6, Route du Soleil, lii meid kiddejum vuossaargâ. Taat vaaikut eromâšávt tuuriistjotolâhân Ranskaast. Virgeomâhááh láá vuosâtutkâmij mield ton uáivilist, et taat puálu lii cokkiittum.
Espanja máddáábeln Los Gallardosist tuorâstuv álgám meccipuálu lii tääl časkâdum, mut tot kiergânij puáldiđ 7 000 hehtaarid eennâm. Taan meccipuálust jammii 12 olmožid, já motomeh finnejii viärráás pyellimvááduid paattârdijnis teikâ olgon jođedijnis. Ain käävcis láá lappâsist. Taan kuávlust ääsih ennuv olgoeennâmliih. Jämmei juávhust láá motomeh belgialiih, nelji Ovtâstum kunâgâskode ässee já ohtâ espanjalâš.
Virgeomâhááh ávžojeh, et meccipyellim riskâkuávluin orrooh čuávuččii páihálijd tiäđáttâsâid, tubdâččii patâremkiäinuid já väridiččii valmâšin tehelijd tiiŋgâid, äššikiirjijd já talkkâsijd, jis kuávlust šadda tárbu evakuistmân. Äššitobdeeh muštotteh meid, et Euroop lieggân jotelubbooht ko eres maailm, mii lasseet kuhes pakkâsij, koškáduvâi já stuorrâ meccipuálui riiskâ eromâšávt Koskâmeerâ kuávluin.
Äššitobdei mield meccipuáluh láá muttum ervidmettumin. Paahâs, koškádâh já korrâ piegah levâtteh tuulâ jotelávt, já talle ulmuid torvolumos čuávdus lii ain jieškođe-uv tiileest meerridmist. Jis virgeomâhááh adeleh evakuistemmiärádâs, te tom lii pyeremus nuávdittiđ ääjithánnáá.
Maadâ-Euroop taankiäsásiih meccipuáluh láá oppeet tuođâštus tast, et luándupuáluh iä innig lah páiháliih luhottesvuođah pic vijđásub kriisah, moi čuávdimân tarbâšuvvoo virgeomâhái rahttâttâm já nube tááhust meid táváláid ulmuid adelum ravvui nuávdittem.
Käldeeh:
– Grote brand bij Parijs niet onder controle, Route du Soleil afgesloten (nos.nl)
– Bosbranden Spanje onder controle, geëvacueerden mogen terugkeren naar huis (nos.nl)
Kove: Urci dream (CC BY-SA 4.0, Wikimedia Commons)