Artemis II ‑mánudâškirdem puoh nelji astronaut, NASA-astronauteh Reid Wiseman, Victor Glover já Christina Koch sehe Kanada komovuotâornijdume astronaut Jeremy Hansen láá Euroopist. Sij kolliistâllii vuossaargâ Euroop komovuotâornijdume ESA teknisii kuávdáást ESTECist Noordwijkist Vuáládâhenâmijn. Sii määđhi ulmen lâi kijtteđ eurooplijd äššitobdeid, kiäh västidii Orion-komovuotâskiijpâ eurooplii huolâttâsmooduul tooimâst historjálii mánudâškirdemist. Sahhiittâlmijn sij meid muštâččii taid aašijd, maid sij feerejii määđhi ääigi.
Cuáŋuimáánust kirdám Artemis II lâi vuosmuš almaidittum kirdemmätki Mánudáá pirrâ Apollo 17 ‑määđhi maŋa ive 1972. Orion-komovuotâskiijpâ huolâttâsmooduul jođettij astronautijd paijeel miljovn kilomeetter máátkán kieŋâlis komovuotân já maassâd Enâmân. Tot västidij meid virde finniimist, ááimu já čääsi tooimâtmist astronautáid, liegâsvuođâ haaldâšmist já komovuotâskiijpâ váldumoottortooimâin.
Astronauteh teivâdii insnerijgijn, kiäh kuccii huolâttâsmooduul tooimâ maŋgâ pirrâmpeeivi ubâ Artemis II ‑kirdem ääigi. Kolliistâlmân uásálistii meid NASA Orion-ohjelm já Artemis-haavâ jođetteijeeh.
Astronauteh uápásmii ESTEC Eagle-kirdemhovdimkuávdážân, kost euroopliih äššitobdeeh kuccii huolâttâsmooduul oovtâst NASA Houston kirdemstivriimáin. Tastoo sij kolliistâllii Human-Robot Interaction Lab -laboratoriost, mii parga robotiikáin puáttei Mánudâš- já Mars-mađhij várás.
Kolliistâllâm ohtâvuođâst NASA luovâttij ESAn Orion-ohjelm tubdâstuspalhâšume sehe kunneekiirjijd merkkân Euroop merhâšittee roolist Artemis II ‑kirdem luhostuumeest.
Astronautij ohjelmân kuulâi meid media teivâm, moos uásálistii ESA sehe Ovtâstum staatâi já Kanada ovdâsteijeeh: ESA almaidittum komovuotâtooimâ já rooboottutkâm hovdâ Daniel Neuenschwander, Ovtâstum staatâi stuorrâvuolgâttuv hovdâ Joseph Popolo já Kanada stuorrâvuolgâttuv hovdâ Hugh Adsett. Peivi nuuvâi epivirgálii teivâdmân Euroop huolâttâsmooduul tiimijn já sii perruin.
ESA ohtsâšpargo Artemis-ohjelmist juátkoo. Kuálmád eurooplâš huolâttâsmooduul lii eidu valmâštâllâm vyelni Artemis III ‑määđhi várás. Taan máátkán uásálist meid eurooplâš astronaut, italialâš Luca Parmitano määđhi kirden. Sust šadda vuosmuš eurooplâš astronaut Artemis-ohjelm astronautij juávhust.
Käldee:
– Astronauten van Artemis II bezoeken ESA (www.esa.int)
Kove: ESA, Pt. Servent