Ovtâstum staatâi komovuotâhaldâttâh NASA vuolgâttij ovtâstumstaatâlii rápartist Missy Elliott pitá komovuotân. NASA tiäđáttâs mield radioanteneh Kaliforniast vuolgâttii Elliott pitá ”The Rain (Supa Dupa Fly)” Venus kulij. NASA ij selvâttâm vuolgâttem suujâ tiäđáttâsâst.
Pittá mađhâšij čuovâliävttoin, suullân 254 miljovn kilomeetterid Enâmist Venusân. Mätki piištij suullân 14 minuttid.
Missy Elliott pittá ”The Rain (Supa Dupa Fly)” almostui ive 1997. Missy Elliott annoo ráp- já popmuusik ikonin, já sun lii vijđedâm syergi eromâšávt nisonáid. ”Alme ij lah rääijin, pic tot lii tuše algâ”, Elliott kommentistij NASA proojeekt. Venus, kuus ”The Rain” vuolgâttui, lii Elliott mielâplaaneet.
”The Rain” lii vuosmuš ráppittá, mii lii vuolgâttum komovuotân. Muusik lâi kuittâg kullum komovuođâst ovdil-uv. NASA vuolgâttij The Beatles pitá ”Across the Universe” komovuotân ive 2008. Ton lasseen muusik lii čuojâttum komovuotâmodulijn, ovdâmerkkân Apollo-rakettijn, já ISS-komovuotâsajattuvâst. NASA muávloo Marsist luhostui joba vuolgâttiđ muusik maasâd Enâmân.
Ovtâstum staatâi komovuotâhaldâttâh NASA vuolgâttij muusik komovuotâmáátkán ive 1977, já mätki juátkoo vala-uv. Voyager-luođânij fáárun pakkajui skiärru, moos NASA adelij noomâ ”The Golden Record”. Tot siskeldij jieškote-uvlágán muusik pirrâ maailm. Voyager-luođânij pargopittán lii tutkâđ komovuođâ, mutâ meiddei levâttiđ tiäđu ulmuin komovuođâ máhđuláid eres ässeid. Tondiet The Golden Recordân láá meiddei jienâttum ulmuu já eres ellei jienah, ovdâmerkkân väzzim já povvâstem jienah.
Käldeeh:
– A history of music in space (www.skyatnightmagazine.com)
– Nasa lähetti Missy Elliottin rap-kappaleen Venukseen (www.hs.fi)
Kove: Andrea Luck (Wikimedia Commons)