Ovtâstum staatâi 46. president Biden almottij miärádâsâstis aalmugân syeinimáánu 21. peeivi viestâpalvâlus X:st: ”Tii presidentin toimâm lii lamaš muu eellim stuárráámus kunnee.” Biden čaalij meid, maht sehe suu piäládâh já ubâ Ovtâstum staatah áiguh hiettâđ suu miärádâsâst kiäsádâttâđ presidentkištoost. Reivâstis Biden muštâlij jieijâs presidentpaajeest. Sun čaalij ovdâmerkkân koronapandemiast já ton tovâttem ekonomisávt hiäjus ääigist. Ton lasseen Biden kiijtij Amerik aalmug já väripresident Kamala Harris sehe puohâid, kiäh láá porgâm suu nube presidentpaje oovdân.
Biden ahe já tiervâsvuotâtile láá puáhtám huolâ suu piäládâhân já kyeditteijeid. Ovdâmerkkân uđâsmediai mield Ovtâstum staatâi oovdiš president Barack Obama, ovdâsteijeeviste oovdiš saavâjođetteijee Nancy Pelosi já maaŋgah demokraatpiäláduv hoovdah lijjii huolâstum Bidenist. Ton lasseen motomeh demokraatpiäláduv ruttâdeijeeh láá uhkedâm koskâlduttiđ jieijâs torjuu, jis Biden juátká presidentkištoost. Biden ave já tiervâsvuođâ láá kritisistám korrâsávt meiddei Donald Trump já suu kyeditteijeeh. Biden lii tääl 81-ihásâš.
Republikaanpiäláduv iävtukkâs lii Ovtâstum staatâi 45. president Donald Trump, kote tooimâi presidentin iivij 2017–2021. Trump irâttij uđđâsist presidentin meiddei ive 2021, mutâ sun táppái vaaljâin Bidenân.
Demokraatpiäládâh ij lah vala valjim jieijâs ovdâsteijee presidentvaljáid. Joe Biden lii muštâlâm, ete sun tuárju presidentkiišton väripresident Kamala Harris. Harris lii uážžum torjuu demokraatpiäláduv eres-uv politikkárijn. Harris valjim ij kuittâg lah vala vises. Ovdâsteijeeviste oovdiš saavâjođetteijee Nancy Pelosi lii iävtuttâm, ete iävtukkâs väljejuuččij jienâstem peht piäláduv siste.
Tave-Amerik tutkâmušprofessor Benita Heiskanen muštâlij Yle aamust, maht republikaanpiäládâh lii jo rahttâttâm toos, ete Kamala Harris iirât presidentin. CNN mield republikaanpiäláduv presidentiävtukkâs Donald Trump kampanjajuávkku lii jo almostittâm ciälkkámuš, mii luávkkáá Harris. Heiskanen kuittâg muštâl, ete republikaaneh iä lah rahttâttâm toos, ete demokraatpiäládâh väljee mottoom eres iävtukkâs presidentvaljáid.
Ovtâstum staatâi presidentvaaljah uárnejuvvojeh skammâmáánu 5. peeivi 2024.
Käldeeh:
– ”On puolueeni ja maan parhaan edun mukaista vetäytyä syrjään” – lue sanasta sanaan, miten Biden kertoi luopumisestaan (yle.fi)
– Neljä merkittävää seikkaa selittää, mihin Bidenin ehdokkuus kaatui (yle.fi)
– Näin Kamala Harris pärjäisi kisassa Donald Trumpia vastaan (yle.fi)
– Historiallinen luopumispäätös syntyi sinisessä lomatalossa vain muutaman ihmisen kanssa – näin tapahtumat etenivät (www.hs.fi)
Kove: The White House (Wikimedia Commons)