Suomâ piäluštemvyeimih uárnejeh jáágárpriikaat kiärgusvuotâohtâduv RYSKE-hárjuttâs Kaamâs já Njiävđám meecijn. Hárjuttâs álgá vuossaargâ, syeinimáánu 22. peeivi, já tot nohá vástuppeeivi, syeinimáánu 26. peeivi.
Hárjuttâsân uásálisteh suullân 250 olmožid já 25 fiävrud sehe Suomâ jáágárpriikaatist já Taažâ suáldátjuávhuin. Hárjuttâs jođetteijen tuáimá eeveerst Ari Mure.
”Hárjuttâs ääigi piäluštemvyeimih uážžuh jotteeđ já ijâstâllâđ koskâpuddâsávt meiddei priivaatmeecijn, já sij uážžuh kevttiđ Čevetjäävri škoovlâ stivrimkuádážin”, muštâlij jáágárpriikaat ovdâkoddehovdâ, eeveerstluutnant Jussi Annala Yle sahhiittâlmist. Jáágárpriikaat lii jo finnim Aanaar kieldâst love Čevetjäävri škoovlâ kevttimân. Hárjuttâs ääigi tot ij kuittâg ááigu kevttiđ magarijdgin priivaatrakânâsâid já -šiljoid.
Jáágárpriikaat lii váruttâm, ete hárjuttâs uáinoo já kulloo Kaamâs já Njiävđám koskâsii kuávlust eres lasseen hárjuttâsâst kevttum pávkkumpatrunij tiet.
Jáágárpriikaat lii juáhám hárjuttâsân kyeskee tiäđáttâs ovdâmerkkân puásuialmaid. Jáágárpriikaat ulmen lii hettiđ puásuituálu nuuvt uccáá ko peri máhđulâš sehe toimâđ nuuvt, ete luándu ij vahaduu. Luándust jotteem ij taarbâš raijiđ hárjuttâs ääigi.
Jáágárpriikaat kiärgusvuotâohtâduv RYSKE-hárjuttâsah uárnejuvvojeh kuohtii ivveest. Hárjuttâsâi ulmen lii testađ viärjukenigâsvuođâlij já piäluštemvuoimij pargovievâ tááiđuid sehe sii valmâšvuođâ toimâđ jieškote-uvlágánijn pirrâsijn. Taan ive oovdeb RYSKE-hárjuttâs tollui Kärigâsnjaargâst uđđâivemáánu 29. peeivist kuovâmáánu 4. piäiván.
Käldeeh:
– Parisataa sotilasta rymistelee pian Inarin metsissä – Puolustusvoimien harjoituksessa saatetaan käyttää yksityisiä maita (yle.fi)
– Jáágárpriikaat kiärgusvuotâohtâduv RYSKE-hárjuttâs (maavoimat.fi)
– Jääkäriprikaatin valmiusyksikkö harjoittelee Karigasniemellä (maavoimat.fi)
– Jääkäriprikaatin valmiusyksikön RYSKE-harjoitus (www.inari.fi)
Kove: Richard Allen (Wikimedia Commons)