Škovlâ álgá onne Aanaar kieldâ škoovlâin ađai Aanaar škoovlâst, Avveel škoovlâst, Čevetjäävri škoovlâst já Avveel luvâttuvvâst. Säämi máttááttâskuávdáást čohčâluuhâmpaje aalgij porgemáánu 11. peeivi.
Iänáduvâst škovlâ aalgij porgemáánu 11. peeivi, mut Ucjuuvâst tot piäijoo joton esken puáttee oho vuossaargâ ađai porgemáánu 17. peeivi. Stuorrâ uásist Suomâst, tego Ruávinjaargâst, Oulust, Jyväskyläst, Hämeenlinnast já Helsigist, škovlâ aalgij jieht.
Aanaar kieldâ tiäđui mield Aanaar kieldâst algâtteh onne váhá vuálá 50 vuosâluokkâlâžžâd. Meeri lii suullân siämmáš ko ovdebái iivij.
Škovlâlij meeri lii kuittâg kiäppánmin nuuvt Anarist ko ubâ Suomâst. Máttááttâshaldâttâs áárvu mield taaijuv Suomâst láá suullân 50 000 vuosâluokkâlâžžâd, mii lii tuhháát ucceeb ko moonnâm čoovčâ já 10 000 ucceeb ko ive 2020.
Aanaar vuosâluokkalijd lii väldimin vuástá eereeb iärrás Kaisu Hautala, kote parga Aanaar škoovlâ anarâškielâlii algâmáttááttâs (1. já 2. luoka) máttáátteijen. Anarâš aavis koijâdij Hautalast, magarijn mieláin sun vuárdá uđđâ škovlâive já uđđâ vuosâluokkâlij teivâm.
– Aaibâs puorijn mieláin. Párnááh láá uáppáseh. Tiäđust-uv lii ain váhá jiäráskittee, et maht taat čohčâ álgá já maht [vuosmuu já nube luoka ohtâsâš] juávkku tuáimá, Hautala muštâl.
Anarâš aavis tuáivut puoh vuosâluokkaláid já eres škovlâláid torvolii já hävskis čohčâluuhâmpaje.
Kove: Valtteri Valkeapolku