Sanasto ennustâs: Kiirjij luoihât­tem­sajan­máksu kiäppán ive 2027 tááláá 25 seentist 23 seentin

Kirjálâšvuođâ tahhee­vuoigâdvuotâ­ornijdâh Sanasto lii ráhtám ennustâs taan ive luoihâsmeerijn sehe puáttee ive luoihâttem­sajanmáávsu tääsist. Ennustâs mield ulmuuh luoihâtteh kiirjijd ain eenâb, mut siämmást kirječälleeh finnejeh jyehi luoikkâsist ain ucceeb ruttâsume.

Sanasto áárvu mield teddilum kirjeh luoihâttuvvojeh ive 2026 paijeel 2,5 miljovn kerdid eenâb ko ive 2025. Meid šleđgâhäämist leijee kirjeh luoihâttuvvojeh eenâb. Ohtsis kirjeluoikkâseh ležeh masa 89 miljovnid, ko vist moonnâm ive loho lâi suullân 86 miljovnid. Vyerdimist luoihâsmereh lasaneh meiddei puáttee ive.

Lasanâm luoihâsmereh iä kuittâg oinuu njuolgist kirječällei ruttâpuursâst. Tastko luoihâttem­sajanmáávsuh máksojeh fastâ meriruuđâst, te jyehi luoikkâsist máksoo ucceeb ruttâsumme, jis luoihâttem lassaan mut meriruttâ piso siämmán.

Sanasto mield oovtâ luoikkâsist máksoo summe sáttá koččâđ ive 2027 tááláá 25 seentist 23 seentin. Tot tábáhtuvá, jis staatâ ive 2027 ruttâtuálu­áárvust luoihâttem­sajanmáávsui várás väridum meriruttâ ij pajeduu ige ovdâskodde mieđeet toos laseruttâdem.

– Luoihâttemsajanmáksu lii tahhee­vuoigâdvuotâ­laahân vuáđuduvvee sajanmáksu čällei tast, ete suu kirjeh luoihâttuvvojeh kirjeráájuin. Lii uáli jo puástud, jis sajanmáksu kiäppán talle ko kirjeh kiävttojeh eenâb, iätá Sanasto ohtsâškodde­koskâvuođâi hovdâ Linda Lappalainen.

Iävtuttâs ive 2027 ruttâtuáluáárvust almostui vuossaargâ čohčâmáánu 21. peeivi. Tast luoihâttem­sajanmáávsui meriruttâ lii 17,178 miljovn eurod. Sanasto toimâjođetteijee Niina Vettensola mield tot kolgâččij leđe suullân 18,4 miljovn eurod, vâi sajanmáksu pisoččij 25 seentist.

– Tárbu luoihâttemsajanmáávsui meriruuđâ paajeedmân lii lamaš jo maŋgâ ive. Tääl koččâmuš ij lah ubâ taggaar paajeedmist, mii pyeredičij čällei puáđuid, peic tast, lii‑uv máhđulâš siäiluttiđ sajanmáávsu tááláá tääsist, Vettensola iätá.

Ruttâtuáluáárvu iävtuttâs lii tääl ovdâskode kieđâvušmist, mon ääigi meriruutân sättih puáttiđ vala nubástusah. Lopâlâš miärádâs ive 2027 ruttâtuálu­áárvust tahhoo ovdil juovlâi.

Ive 2026 Sanasto poostij siäiluttiđ sajanmáávsu 25 seentist ovdâskode mieđettem 200 000 euro laseruttâdem sehe oovdeb ivveest sirdum 450 000 euro sirdummeriruuđâ áánsust.

Käldee:
– Sanaston ennuste: Vuonna 2027 enemmän kirjalainoja, vähemmän lainakohtaista korvausta (sanasto.fi)

_{Kove: Valtteri Valkeapolku}