Staatârääđi lii meridâm, et Suomâ já Ruošâ eennâmrääji räjijotteemsajeh pisoh ain kiddâ 14.4.2024 räi. Aalmugijkoskâsii suojâlem ij pyevti uuccâđ Suomâ já Ruošâ koskâsii eennâmrääji alne. Ääšist meridui staatârääđi čokkânmist 8.2.2024.
Tääl tohhum miärádâs juátká nuorttârääji tievâslii kiddim kuovttijn mánuppoojijn. Virgeomâhái tiäđui mield lii vyerdittettee, et kuálmádij enâmij ulmui enâmânpuáttim jotkuuččij tállân uđđâsist, jis rääji rastaldittemsajeh lekkuuččii.
Ruošâ rääji aldasijn orodeh mii tiäđui mield ucemustáá čyeđeh mut máhđulávt tuhátteh sirdoliih, kiäh vyerdih máhđulâšvuođâ juátkiđ Suomân, paahud sisminister Mari Rantanen.
Nuorttârääji tievâslii kiddim juátkim lii addiittetteht ahheev eromâšávt tagaráid Suomâst ässee ulmuid, kiäin láá perruujesâneh já aldemuuh rääji nube peln. Räjijotteemsojij koskâpuddâsâš kiddim lii kuittâg čuávumuš Ruošâ tooimâin, moi tiet Suomâ ferttee asâttiđ aalmuglii torvolâšvuođâ eres ašij ovdiibel, sun juátká.
Koskâuámistum enâmânpuáttim lii ohtâ Ruošâ vyehi painâštiđ já vaiguttiđ Suomâ já EU torvolâšvuotân já ohtsâškodálii täsitiädun. Sisministeriö lii seelvâtmin muulsâiävtulijd tooimâid almoon loopâtmân ohtsâšpargoost eres ministeriöigijn. Huolâlâš laavâasâttemlâš selvâttempargo já ton vuáđuld tohhum miärádâsah väätih tuárvi kuhes valmâštâllâmääigi, čielgee Rantanen.
Käldee:
– Valtioneuvoston päätös rajanylityspaikkojen väliaikaisesta sulkemisesta ja kansainvälisen suojelun hakemisen keskittämisestä (valtioneuvosto.fi)
Kove: Lauri Heikkinen, valtioneuvoston kanslia