Alexander Stubb lii Suomâ 13. president. Lopâlii puátusist Pekka Haavisto finnij 48,4 % jienâin (1 476 548 jiennâd) já Stubb 51,6 % jienâin (1 575 211 jiennâd). Puáđus lâi čielgâs jo munejienâi rekinistmij maŋa, tastko Stubb ovdâmätki lâi tommittáá styeres.
President Stubb tuáimá tääl professorin EU-ollâopâttuvâst Firenzest. Pooliitlii karrieeris ääigi sun lii toimâm njunošministerin, olgoministerin, aalmugovdâsteijen já europarlamentarikkárin. Stubb lii 55-ihásâš. Suu kálgu Susanne Innes-Stubb lii juuriist. Stubb nomâttuvvoo virgásis njuhčâmáánu 1. peeivi.
Tááláš president Sauli Niinistö tuáivuttij luho čuávuváá täsivääldi presidentân, professor Alexander Stubbân vaaljâeehid pasepeeivi kuovâmáánu 11. peeivi. Ton lasseen president Niinistö sáárnui meid aalmugovdâsteijee Pekka Haavistoin já kiijtij suu fiijnâ kampanjast.
Jienah sämikuávlu kieldâin
Sämikuávlu kieldâin kuulmâ kieldâst (Iänodâh, Aanaar já Suáđigil) Stubb čokkij eenâb jienâid, já Ucjuuvâst vist Haavisto vuoitij. Sämikuávlu kieldâin presidentiävtukkâsâi jienah juáhášuvvii čuávuvávt:
Iänodâh: 53,7 % Stubb – 46,3 % Haavisto
Aanaar: 50,3 % Stubb – 49,7 % Haavisto
Ucjuuhâ: 53 % Haavisto – 47 % Stubb
Suáđigil: 55,9 % Stubb – 44,1 % Haavisto
Ubâ Laapi vaaljâpirrâduvâst, ko puoh jienah lijjii rekinistum, Haavisto čokkij 50,8 % jienâin.
Käldeeh:
– Presidentinvaalit 2024 (www.hs.fi)
– Presidentti Niinistö onnitteli seuraavaksi tasavallan presidentiksi valittua Alexander Stubbia (www.presidentti.fi)
– Tulospalvelu (vaalit.yle.fi)
Kove: Jussi Ratilainen