Täsivääldi president Alexander Stubb tuálá JEF-enâmij njunoščuákkim tuorâstuv njuhčâmáánu 26. peeivi Presidentlanneest Helsigist. Čuákkimist uárnejuvvojeh kulmâ savâstâllâm, main fáddán láá eereeb iärrás JEF-enâmij toorjâ Ukrainan já Euroop almolâš torvolâšvuotâtile.
Čuákkimân uásálisteh Stuorrâ-Britannia njunošminister Keir Starmer, Liettua president Gitanas Nausėda, Taažâ njunošminister Jonas Gahr Støre, Ruotâ njunošminister Ulf Kristersson, Latvia njunošminister Evika Siliņa, Eestieennâm njunošminister Kristen Michal, Island njunošminister Kristrún Frostadóttir já Vuáládâhenâmij njunošminister Rob Jetten. Tanska kunâgâskode ovdâsteijee ij lah aavis tiäđui mield vala almottum.
JEF-enâmij lasseen Ukraina president Volodymyr Zelenskyi já Kanada njunošminister Mark Carney uásálistev čuákkimân káidusin.
Peeivi ääigi uásálisteeh kuállejeh Räjikocceemlágádâs olgokocceemtaampâst, kost sij uápásmuveh Suomâ Räjikocceemlágádâs merâtooimân. Peeivi ohjelm čokkeluvá president Stubb išedistem eehidpurrâmušân.
JEF ađai Joint Expeditionary Force lii Stuorrâ-Britannia jođettem maaŋgâkoskâsâš piäluštâsohtsâšpargoraami, mon ulmen lii ovdediđ uásálistee-enâmij suáldátlii valmâšvuođâ ohtâsij hárjuttâsâiguin, estâdiđ jieškote-uvlágánijd kriisâid sehe táárbu mield meid toimâđ oovtâst kriisâtiilijn. JEF-ohtsâšpargo váldutoimâpiirâs lii Tave-Euroop já Nuorttâmeerâ kuávlu.
Ovdebáš JEF-enâmij njunoščuákkim uárnejui Taažâst vyesimáánust 2025.
Käldee:
– Tasavallan presidentti isännöi JEF-maiden huippukokousta Presidentinlinnassa (www.presidentti.fi)
Kove: Marit Henriksson (Wikimedia Commons)