Sämitiggevaaljâi tärhistemlävdikodde lii hilgom sämitiggevaaljâi puáttus Ruotâst vuossaargâ syeinimáánu 14. peeivi. Suijân lii tot, ete Arjeplog kieldâ jienâstemsaajeest puoh 88 jiennâd iä tuhhiittum, tastko vaaljâäššikirjeh iä lamaš kieđâvuššum olmânáál. Tábáhtusâst adeluvvojii 11 vaidâlussâd.
Hilgommiärádâsâst onnui merhâšitten eromâšávt Samerna-piäláduv vaidâlus. Piäláduv mield jienah, moh hilgojii, liččii puáhtám vaiguttiđ vaaljâi puátusân. Piäláduv saavâjođetteijee Anders Kråik lii tuđâvâš miärádâsân.
– Lii pyeri tobdo, ko mist lii tuáimee riehtistaatâ, mast láá vuáđuliih riehtivuáđujurduuh, moh siäilutteh riehtitorvo. Miärádâs lii tehálâš legitimiteetân já luáttámušân, mii kuáská demokraatlii vuáhádâhân, Kråik iätá.
Uđđâ vaaljah uárnejuvvojeh roovvâdmáánu 5. peeivi. Sämitige saavâjođetteijee Håkan Jonsson já vaaljâlävdikode saavâjođetteijee Jenny Granberg lává soroliih tast, ete vaaljah kalgeh uárnejuđ uđđâsist. Sunnuu mield uđđâ vaaljâi ruttâdem lii väädis orniđ. Vaaljah mäksih máhđulávt 1,6–2,8 miljovn ruvnâd (140 000–250 000 eurod).
Taat lii vuossâmuš tohe ive 2001 maŋa, ko Ruotâ sämitiggevaaljah uárnejuvvojeh uđđâsist.
Käldeeh:
– Sametingsvalet ogiltigt – omval väntas efter valfel (www.sverigesradio.se)
– Sámedikkiválggat leat fámohuvvon – Šaddet ođđa válggat (www.svt.se)
– Ruotsin saamelaiskäräjävaalien tulos kumotaan ja uudet vaalit järjestetään (yle.fi)
Kove: Dag Lindgren (Wikimedia Commons)