Täsivääldi president Sauli Niinistö tuáimá jiečânâsvuođâpeeivi juhlevuástáväldim išedin já váldá kálguinis Jenni Haukioin vuástá kuosijd Presidentlanneest koskoho, juovlâmáánu 6. peeivi 2023. Vuástáväldim teeman lii ääigih muttojeh.
Presidentlaanan láá taan ive puávdejum suullân 1 700 maaŋgânáál áárvustonnum kyessid pirrâ Suomâ. Kyessin láá eereeb iärrás kuhháá jieijâs pargosyergist porgâm ulmuuh, kiäh láá lekkâm pálgáid, adelâm šiev ovdâmeerhâ já toimâm mentorin. Ton lasseen juuhlán láá puávdejum nuorâ innovatiivliih čepis ulmuuh, puátteevuođâ miänástussáin pargeeh já meiddei ohtsâškode já aargâ torvolâšvuođâ visásmitteeh. Eromâš huámášume lii tavoin, moi peht nuorah já párnááh láá finnim torjuu.
Merhâšittee uási puávdejum kuosijn láá taan-uv ive vuosmuu keerdi fáárust jiečânâsvuođâpeeivi juuhlijn.
Kunneekyessin láá suátiveteraaneh já lotah, kiäid presidentpaarâ váldá vuástá vuástáväldim ohtâvuotân uárnejum káhvástâlmist Presidentlane Keltainen sali -visteest. Veteraaneh já lotah puátih siisâ taan ive Esplanadi peln, já siämmáá ääigi čuájá Sibelius Jáágár marssi.
Muusikist kullojeh syemmilâšvuotâ já ärbi
Staatâsali muusikist västid staatâlijn ovdâstempargoin jo paijeel 200 ihheed västidâm Kaarti suáittukodde já Kaarti Combo, solistinis Ilta. Muusikvaljiimeh láá tohhum äärbi uáinust já syemmilâš muusik tiädutmáin. Syemmilâš klassikkoi lasseen tanssâmuusikist láá fáárust soovâtmeh uđđâsub pittáin.
Kunneekuosij, suátiveteraanij já lotai káhvástâllâmtilálâšvuođâst lávlu syemmilii kuorotaiđuu oovdeldjottee Ylioppilaskunnan Laulajat.
Kuálmád keerdi saaloong muusikist västid Sami Pitkämö jieijâs noomâ kyeddee orkesteráin. Orkester ohjelmân kuleh rähistum klassikkoh já časkoslavluuh maaŋgâi luvij ivij tyehin.
Faalâdmist váldoo huámášumán ovdebái jiečânâsvuođâpeivij falâdem
Ive 2023 jiečânâsvuođâpeeivi faalâdmijn eromâš saje finnejeh päikkieennâmlâš purrâmâš já ustevlâšvuotâ pirrâsân. Eromâš teeman láá taan ive presidentpaarâ ovdil ornim vuástáväldimeh, main jyehi juhleest lii fáárust miinii pivnohis purrâmušâid.
Juhlijd láá väljejum eromâšávt luáná, aldapurrâmuš já eres purrâmušah, moh kulâtteh pirrâs nuuvt uccáá ko máhđulâš. Fáállun láá eereeb iärrás kyelipurrâmuš, meccivalje, myerjih, šadoh já syemmiliih kuobbâreh. Ive 2023 ruonâsin väljejum porkkan lii kevttum vuojâleibikááhuin.
Meid oppâlágádâsohtsâšpargo juátkoo. Kievkkânist pargeldeh Perho Liiketalousopisto uáppeeh, kiäh valmâšteh vuojâleibikááhuid. Faalâdmijn išedeh Espoo kuávlu škovlimkieldâornijdume Omnia uáppeeh.
Tiervâsvuottorvolâšvuotâ váldoo huámášumán
Tiervâsvuottorvolâšvuotâ lii valdum huámášumán maaŋgânáál. Presidentlane áimumolsom tuáimá pehtilubbooht ko táválávt, já kuosij kiävtust leijee soijijd láá pieijum ááimuputesteijeeh já kietâdesi. Meiddei maaskih láá fáállun, jis kiinii taid haalijd kevttiđ.
Kuossijd lii meid vuolgâttum avžum leđe puáđihánnáá, jis sij tobdeh jieijâs illáellen, teikâ jis sist láá korona tavdâmeerhah teikâ jis sij láá aldemui aigij painâšum koronavirusân.
Käldee:
– Itsenäisyyspäivän vastaanoton teemana ajat vaihtuvat (www.presidentti.fi)
Kove: Matti Porre / Tasavallan presidentin kanslia