Anarâškielân lii almostum uđđâ nooveelantologia, mon novellijd anarâškielâ sárnooh láá čáállám maaŋgâi iivij ääigi. Ton paječaalân lii väljejum Annika Pasasii čäällim nooveel paječaalâ ađai Kielâ, mii ij kuássin jáámmám. Taat kovvee pyereest meid anarâškielâ eellimpálgá.
Antologia siskeeld ohtsis 18 novellid. Vyerdimist láá rähisvuotâmainâseh, science fiction, eeppisiih novelleh já vuosmuu tove meid dekkareh. Novellij kukkodâh mulsâšud muádi siijđost masa 50 siijđon. Fáárust láá sehe fiktiivliih novelleh já novelleh, moh vuáđuduveh tuotâtábáhtussáid. Veikkâ motomijn novellijn láá vuáđđun tuotâtábáhtusah, toh láá kuittâg čallum fiktiivlijn uáinoin. Antologiast novelleh láá uárnejum čällei mield, tastko jieškođe-uv čällest lii jieijâs stijlâ. Čällei juávhust láá sehe eenikielâliih sárnooh já ulmuuh, kiäh sárnuh anarâškielâ viereskiellân. Iänááš čälleid novellij čäällim lii lamaš äigiájánâs, mut motomeh antologian väljejum novelleh láá šoddâm anarâškielâ kuursâi já čäällimpáájái ääigi.
Taat uđđâ čuágáldâh lii luándulâš já vuordum jotkâ Matti Morottaja já Ilmari Mattus toimâttem vuosmuu nooveelantologian Kyelisieidi maccâm já eres novelleh (2005). Čälleeh láá uásild siämmááh ko vuosmuu antologiast-uv, mut taan tove fáárust láá meid maaŋgâi uđđâ čällei teevstah.
Kielâ, mii ij kuássin jáámmám lii omâstum anarâškielân já puoh eres-uv ucceeblovokieláid, moh sárnojeh pirrâ maailm. Antologia kuástidmân Anarâškielâ servi lii finnim išeruuđâ Sämitiggeest.
Kirje puáhtá tiiláđ seervi mediapargest (fabrizio.brecciaroli@gmail.com). Tom puáhtá meiddei uástiđ Duodji Shopist Sajosist já Sämimuseo Siidast.
Kove: Fabrizio Brecciaroli