Tanska parlament lii tuhhiittâm laavâ, mii kiäldá oskoldâhlij tevstâi puáldim kirjen. Keevâtlávt taat meerhâš Kooraan puáldim kieldim. Koranij puáldim lii tijmá tovâttâm ennuv liävuttemesvuođâid Skandinaviast.
Tanska vuoigâdvuotâminister Hummelgaard mield laavâ ulmen lii lopâttiđ oskoldâhlij vuovij ”pilkkedem”. Laahâ finnij 94 jiennâd peeleest já 77 jiennâd vuástá. Käävcis aalmugovdâsteijein iä jienâstâm. Virgálávt laahâ kiäldá tagarij tevstâi heiviimettumes kieđâvuššâm almolávt, moid oskoldâhlijn juávhuin lii perustume.
Lahâiävtuttâs finnij kriitiik eereeb iärrás parlament uálgispele suájáást. Parlamentarikkáreh kyedittii tom, et Tanska ij kolgâččii mutteđ lahâasâttâsâid tondiet, et olgoeennâmliih aalmugeh luávkkášuveh mastnii, mii tábáhtuvá Tanskaast.
Stuime Bagdadist
Kooraan puáldimeh láá tábáhtum eenâb skandinavisijn enâmijn, já taat lii tovâttâm protestijd muslimenâmijn. Syeinimáánu rääjist islam vuástásiih mielâčájáttâsah láá lamaš 500 verd. Motomijn mielâčájáttâsâin Koraneh láá cokkiittum stuorrâvuolgâttuvâi já moskeijai oovdâst. Puáldimeh láá tábáhtum meid kaavpugoosijn, main láá eenâb enâmânvärrejeijeeh.
”Tágáreh mielâčájáttâsah sättih vahâgittiđ Tanska koskâvuođâid eres aalmugáid, já toh láá meid čuolmâ mii jieččân hiettâm já torvolâšvuođâ uáinust”, vuoigâdvuotâminister Hummelgaard eeđâi.
Moonnâm keesi raporteh Kooraan puáldimist tovâttii stuorrâ mielâčájáttâs Tanska Bagdad stuorrâvuolgâttuvvâst. Mielâčäitteeh irâttii ruámustiđ siisâ stuorrâvuolgâttâhrakânâsân Irak uáivikaavpug čovgâsávt suojâlum ruánáá stielâsist, kost láá maaŋgah stuorrâvuolgâttuvah já haldâttâsrakânâsah. Taan ive Tanska Tuurki-stuorrâvuolgâttâh kaartâi sárnuttâlmân, tastko kyehti Kooraan lijjii cokkiittum mielâčájáttâsâin Kööbenhamânist.
Käldee:
– Deens parlement akkoord met verbod op koranverbrandingen (nos.nl)
Kove: merkulos (Pixabay)