Anarâškielâ seervist lii tääl almostum Jeff Kinney särjikoveroomaan ”Čuovâuáivi peivikirje – korrâ tuotâvuotâ”, mon Fabrizio Brecciaroli lii jurgâlâm anarâškielân. Kirje lii algâalgâlávt čallum eŋgâlâskielân.
”Čuovâuáivi peivikirje – korrâ tuotâvuotâ” lii Čuovâuáivi peivikirje ‑rááiđu viiđâd kirje. Rááiđu vuossâmuš kirje almostui eŋgâlâskielân ive 2007. Tastmaŋa ráiđu lii vijđánâm jotelávt, já roovvâdmáánu 21. peeivi 2025 Ovtâstum staatâin almostuvá ton 20. kirje. Rááiđu sáŋgárin lii paješkoovlâ uáppee Greg Heffley. Suu perrui kuleh eeči (Frank), enni (Susan), stuorrâviljâ (Rodrick) já uccâviljâ (Manny). Peivikiirján Greg čáálá jieijâs elimist já feeriimijn Plainview-nommâsii kaavpugist.
Anarâškielâ servi lii finnim ameriklii kuástideijest love almostittiđ ubâ rááiđu anarâškielân. Ađai iivij mield puátih lase Čuovâuáivi-kirjeh. Rááiđu vuossâmuš kirje almostui anarâškielân ive 2020 noomáin ”Čuovâuáivi peivikirje”. Tom lii jurgâlâm Mikkâl Morottaja. Fabrizio Brecciaroli jurgâlem nubbe já kuálmád kirje almostuvvii ive 2022 nomâiguin ”Čuovâuáivi peivikirje – stuorrâviljâ almaaštâl” já ”Čuovâuáivi peivikirje – jo rijttáá”. Fabrizio Brecciaroli lii jurgâlâm meiddei rááiđu niäljád kirje, mii almostui anarâškielân ive 2023 noomáin ”Čuovâuáivi peivikirje – hyenes luho keesi”.
Taankiärdásii kirjeest Greg tiätá, et esken rävisolmožin sun piäsá čäittiđ eromâšvuođâs ubâ maailmân. Mut ko pyeremus skippáár piergee pyereest suuttáá-uv, ko palvâlem pääihist ij tooimâ tegu kolgâččij já ko saavah ovdâsvástádâs jyehimist láá aaibâs liijkás ennuv, te Greg ferttee mutteđ mielâs. Ij äävti ko irâttiđ navdâšiđ nuorâvuođâst nuuvt ennuv ko peri máhđulâš. Piergee-uv Greg ohtuu? Já mii lii korrâ tuotâvuotâ?
Kirje puáhtá tiiláđ seervi mediapargest (callee@anaraskielaservi.fi). Tom puáhtá meiddei uástiđ Duodji Shopist Sajosist.
Kove: Fabrizio Brecciaroli