Ive 2018 rääjist seervist láá lamaš kyehti loostâ: Anarâš-lostâ já Loostâš. Majemui iivij Anarâš-lostâ lii almostum kulmii, já niäljádin numerin lii almostum jyehi ive Anarâš-kalender. Loostâš-uv lii almostum neljii. Anarâš-loostân já Lostâžân lii kuittâg lamaš vaigâd finniđ ruttâdem. Ive 2021 räi tile lâi taggaar, et suullân peeli ruttâdmist poođij Taiđuu ovdedemkuávdáš Taikest já nubbe peeli Sämitiggeest. Vaidâlittee kale ive 2022 rääjist Taike ij lah monnii suujâ tiet mieđettâm innig maiden Anarâškielâ seervi lostâtooimân.
Ruttâdem vänivuotâ lii pieijâm Anarâškielâ seervi jurdâččiđ pyerebeht ubâ lostâtooimâs. Lii čielgâs, et täst ovdâskulij Anarâš-lostâ já Loostâš iä pyevti almostuđ siämmáá ennuv ko ovdil. Toos ij oovtkiärdánávt finnii tuárvi ruuđâ. Servi taarbâš kuittâg ruttâdem, vâi tot puáhtá juátkiđ noonâ luuhâm- já čäällimkulttuur huksimpargoos. Tondiet servi lii vuáđudâm Anarâš aavis, mii almostuuškuođij njuhčâmáánu 6. peeivi 2023. Toos lii älkkeb finniđ ruttâdem. Jyehi ive puáhtá uuccâđ ”Ucceeblovokielâlii lostâmedia torjuu” (suomâkielân: vähemmistökielisen sanomalehdistön tuki), mon juáhá Máttááttâs- já kulttuurministeriö. Anarâš aavis lii jo finnim ruttâdem ihán 2023, já tast láá pyereh máhđulâšvuođah finniđ ruttâdem puátteevuođâst-uv tondiet ko tot tiävdá pyereest puoh vátámâšâid, moh láá asâttum ucceeblovokielâlii digiaavisân.
Anarâš aavis lii tiäđust-uv tehálâš lasattâs. Anarâškielâ servi lii kuittâg tommittáá ucce, et naavcah iä pijsáá kuulmâ loostâ tooimâtmân – eromâšávt jis váldoo huámášumán tot, et Anarâš aavisân čálloo maŋgii ohhoost. Ton lasseen seervi naavcah tarbâšuvvojeh meiddei Wikipedia paijeentolâmân já kuástidemtooimân. Anarâškielâ servi almostit uđđâ kiirjijd jyehi ive, já tom tot haalijd porgâđ puátteevuođâst-uv.
Ovdeláá mainâšum suujâi tiet Anarâš loostâ já Lostii numerij meeri lii kiäppánâm ive 2023, já taat ovdánemsunde juátkoo aldaiivij-uv.
Taan räi ive 2023 Anarâš-lostâ lii almostum tuše ohtii, já nubben numerin lii almostum Anarâš-kalender. Anarâškielâ seervi jesâneh, kiäh ääsih Suomâst, láá jo finnim ive 2024 kalender pááikán. Olgoenâmijn ässee jesânáid tot vuolgâttuvvoo poostâ peht skammâmáánu loopâst teikâ majemustáá juovlâmáánu aalgâst. Aavis lohhein, kiäh iä lah seervi jesâneh, lii forgâ máhđulâšvuotâ uástiđ kalender Säämi Tyejeest já Siidast, ko tot puáhtoo vyebdimnáál skammâmáánu 27. peeivi. Taan ive peln lii puátimin vala ohtâ Anarâš-lostâ, mii lii tääl tuáijimmuddoost. Tot almostuvá juovlâmáánust. Tast ovdâskulij Anarâš-lostâ almostuvá siämmáá ennuv ko taan ive, mut äigitavlu muttoo ucánjáhháá. Vuossâmuš nummeer almostuvá ain-uv cuáŋuimáánust, nubbe nummeer almostuvá roovvâdmáánust, já Anarâš-kalender almostuvá kuálmádin numerin ive loopâst.
Loostâš lii almostum kuohtii ive 2023: vuossâmuš nummeer almostui njuhčâmáánust, já nubbe nummeer vyesimáánust. Vaidâlittee kale taan ive numereh láá tuáistáážân majemuuh numereh ađai Loostâš ij almostuu innig. Lostii čalluuh láá kuittâg táválávt tagareh, et toh pyehtih älkkeht almostittuđ Anarâš aavis blogijn teikâ Anarâš-loostâst. Lii tiäđust-uv šaali, et Loostâš ij almostuu innig. Tot lii faallâm keppisis luhâmuš nuoráid, já nuorah láá meiddei lijkkum čäälliđ mainâsijd Lostâžân. Nubástus lii kuittâg velttidmettum. Lostâtoimâ ij lah nuuvtá, já tom ferttee heiviittiđ nuuvt, ete Anarâškielâ seervi naavcah kiävttojeh toos, mon várás lii máhđulâš finniđ ruttâdem. Jis puátteevuođâst ruttâdem- já pargovyeimitile Anarâš-loostâ já Lostii várás muttoo pyereeb suundán, te Loostâš puáhtá máhđulávt almostuuškyettiđ uđđâsist.
Kove: Fabrizio Brecciaroli