NASA tieđeet, et aalmugijkoskâsii komovuotâsajattuv ISS (International Space Station) astronautjuávkku 11 máccá Enâmân tolebiššáá ko lâi vuávájum. Algâalgâlâš vuávám lâi macâttiđ taam juávhu Enâmân kuovâmáánust 2026 adai ihepele keččin komovuotân päčimist. Suijân toledum maccâmân lii juávkun 11 kullee oovtâ astronaut tiervâsvuotân kyeskee äšši, mii iiđij majebaargâ (6.1.). NASA ij muštâl tärhibeht, maggaar tiervâsvuotâčuolmâ astronautist lii, ige tomgin, kotemuu astronautân taat tiervâsvuotâäšši kuáská. NASA almoot, et koččâmušâst leijee astronaut tile lii stääđis, adai toledum maccâmist huolâhánnáá koččâmuš ij lah etitiileest ige etimaccâmist. Koččâmuš lii kuittâg váddásub ääšist, mon tipšomân iä lah tuárvi talhâstieđâliih niävuh komovuotâsajattuvvâst. Taat lii vuosmuš kerdi ISS 25‑ihásii toimâpaje ääigi ko juávhu maccâm toleduvvoo astronaut tiervâsvuotâčuolmâ keežild.
NASA lii algâttâm valmâštâlmijd juávhu maassâd kirdem várás. Juávkku 11 máccá Enâmân aldemui peivij. Veikâ koččâmuš lii oovtâ astronautist, te NASA ferttee macâttiđ ubâ juávhu siämmáin rakettáin, vâi puohháid komovuođâst leijee astronautáid lii saje päikkimáátkán. Máhđulii čuávuváá etitiileest, mii ij velttidhánnáá taarbâš leđe tiervâsvuotâčuolmâ, komovuotâsajattâhân päccee eres astronauteh ferttejeh meid peessâđ torvolávt Enâmân.
Astronautij vástuppiäiván 9.1. vuávájum komovuotâväzzim lii sirdum taan esken ittáám tiervâsvuotâčuolmâ keežild, já toos kiäččoo tääl uđđâ äigi. Lii kuittâg tieđettum, et koččâmušâst leijee astronaut tiervâsvuotâčuolmâ ij lah mahten čonnum puátimin leijee komovuotâväzzimân ige mudoigin toimâmân komovuotâsajattuvvâst. Čuolmâ lohtâs tiäduttes tilán, mii mudoi-uv hástá ulmuu roopâ.
Astronautij tiervâsvuotâ lii ain lamaš NASAst ollâ prioriteet. Astronautij talhâstieđâliih tutkâmušah láá čovgâdeh ovdil vuolguu. Astronauteh láá meid hárjuttâllâm puohlágánij etitilij várás, já meiddei taat tile lii hárjuttâllum pyereest muuneeld.
NASA totká tääl, pesâččij-uv čuávuvâš juávkku 12 jo tolebiššáá komovuotâsajattâhân. Komovuotâsajattâhân pääcih tääl kulmâ astronaut: ohtâ ameriklâš astronaut já kyehti ryeššilii kosmonaut.
Komovuotâmissio 11 juávkun kuleh nelji astronaut: ameriklâš astronaut Michael ”Mike” Fincke, NASA-astronaut Zena Cardman, ryeššilâš Roscosmos-kosmonaut Oleg Platonov já jaapaanlâš JAXA-astronaut Kimiya Yui. Mike Fincken taat komovuotâmätki lii jo suu niäljád. Zena Cardman já Oleg Platonov lává vuosâmäđhistis. Yuin taat mätki lii nubbe.
Käldeeh:
– NASA tieđettemtilálâšvuotâ 8.1.2026 (www.youtube.com)
– NASA’s SpaceX Crew-11 (www.nasa.gov)
– Veteraanastronaut Michael ”Mike” Fincke kirdá jo niäljád tove ISS-komovuotâsajattâhân (www.anarasaavis.fi)
Kove: NASA (Wikimedia Commons)