Sämitigge viättá juuhlijd uđđâ sämitiggelaavâ já vaaljâpaje 1.9.2024–31.12.2027 kunnen Säämi kulttuurkuávdáš Sajosist vástuppeeivi 6.2.2026 tme 11 rääjist. Tilálâšvuođâ lii máhđulâš čuávvuđ meid káidusin njuolgâ vuolgâttâs peht čujottâsâst www.sajos.fi/live.
Tilálâšvuotân uásálistem pääihi alne váátá almottâttâm muuneeld. Almottâttâm luhostuvá taan liiŋkâ peht, já almottâttâmäigi lii 23.1.2026 räi. Tilálâšvuotân uárnejuvvoo meid sáttu Hettaast, Čevetjäävrist, Ucjuuvâst, Avelist já Vuáčust. Sáátun puáhtá almottâttâđ siämmáá liiŋkâ peht. Soojij meeri lii räijejum, adai kannat almottâttâđ nuuvt jotelávt ko máhđulâš.
– Uđđâ vaaljâpaje juhlom lii ain merhâšittee muddo, já taan tove mij juhlop meid historjálii juvso. Uđđâ sämitiggelaahâ lii meritiätulii pargo puáđus, mii naanood sämmilii jiešhaldâšem já puáttee suhâpuolvâi vuoigâdvuođâid, iätá Sämitige I värisaavâjođetteijee Leo Aikio.
– Taan juhle peht mij halijdep čäittiđ kijttosijd puoh sijjân, kiäh láá iivij mield porgâm uđđâ sämitiggelaavâ oovdân. Siämmást mij keččâp meid puátteevuotân, taan vaaljâpajan já ovdâsvástádâsân, mon mij kyeddip sämmilij ovdâsteijen, Aikio muštâl.
Juhlepeeivi kuávdáš äššin láá uđâsmittum sämitiggelaavâ merhâšume já vaaljâpaje ulmeh. Peeivi ääigi kullojeh sahâvuáruh já muusik pirrâ Säämi. Juuhlán pääihi oolâ láá puávdejum sämisiärváduv jesâneh já ohtsâškode vaikutteijeeh, Suomâ staatâ já jieškote-uvlágánij ohtsâšpargopeelij ovdâsteijeeh sehe Taažâ já Ruotâ Sämitiigij presidenteh.
Maŋeláá siämmáá peeivi ohjelmist lii Ulla Pirttijärvi já Ulda ‑juávhu konsert Sajosist. Konsert lii puohháid áávus já nuuvtá.
Juhle täärhib ohjelm almostittoo Sämitige nettisijđoin čujottâsâst www.samediggi.fi.
Käldee:
– Sämitigge juhlo uđâsmittum sämitiggelaavâ sämmilij aalmugpeeivi Anarist (samediggi.fi)
Kove: Vesa Toppari / Sämitigge