Majemui aaigij korrâ puolâšeh láá tovâttâm puolâštuárgástâsâid Tave-Suomâ kuávlust.
Helsig ollâopâttuv seismolog Kati Oinosii mield ovdâmerkkân Oulu kuávlust láá tábáhtum maaŋgah jieŋâtuárgástâsah moonnâm loppâoho ääigi. Toi ohtâvuođâst láá kullum jienniis pávkkámjienah. Meiddei eres aiccâmsajattuvâin tego Siikajokist, Pyhäjokist, Ranuast já Ucjuuvâ Kiävust mitteduvvojii korrâ puolâšij tovâttem tuárgástâsah. Tađe mäddiláá tuárgástâsah iä mittedum.
Oinonen čielgee, ete puolâštuárgástâsah šaddeh táválávt talle ko liegâsvuotâ vuállán jotelávt ige muotâ lah ennuv. Pávkkámjienâ šadda tast, ko korrâ puolâšij tiet eennâm ase jiäŋu já luoddânâdškuát. Tuárgástâsah šaddeh eromâšávt tagarijn kuávluin, main eennâmvuáđust lii ennuv čääci. Meiddei jiäŋŋoo čääci sáttá tovâttiđ siämmáálágán jienâ.
Áimutiettuu lágádâs mield ovdâmerkkân Oulu kuávlust muotâ lii eidu tääl tuše kulmâ senttimeetter, mutâ puolâš lii lamaš masa kulmâlov cekkid. Puolâštuárgástâsah sättih šoddâđ meiddei talle ko piivâld jotelávt.
Tuárgástâsâi tärhis soojijd lii vaigâd miäruštâllâđ, tastko toh láá nuuvt uceh, ete toh uáinojeh tuše páihálijn aiccâmsajattuvâin, muštâl Oinonen. Tuárgástâsâin šoddâm jienâ vist sáttá kulluđ jalahâs puolâššooŋâst kukken, joba kilomeetterij keččin. Oinosii mield ovdâmerkkân eennâmtuárgástâsâi tâi pávkkám jienâ puáhtá kulluđ joba muádilov kilomeetter keččin. Puolâštuárgástâsah láá viehâ siämmáálágáneh ko eres seismologisiih tábáhtumeh, tego eennâmtuárgástâsah, ruukij pávkkáámeh já täävvirjunái spoorrân. Puolâštuárgástâsah láá uápis almoon sudâhánnáá tuálukuávluin.
Puolâštuárgástâsah pyehtih vahaduttiđ ovdâmerkkân tááluid, pocceestuvâid já luodâid. Oulu ollâopâttuv eromâštotkee Kari Moisio mield puolâštuárgástâsah sättih lasaniđ šoŋŋâdâhnubástus keežild.
Käldeeh:
– Kireä pakkanen on saanut maan järisemään kovaäänisesti Oulussa (yle.fi)
– Pakkasjäristykset: Uusi maanjäristysvaara pohjoisessa? (www.oulu.fi)
Kove: Jasmina Schreck