Koskâ-Euroopist, eromâšávt Vuáládâhenâmijn, muotâ lii siävuttâm eellim já jotoluv ollásávt. Amsterdam kirdemkiedist Schipholist láá macâttum 300–700 kirdemvuárrud peeivist. Luáppijâi maŋa-uv loppâookon lii lopedum muotâ, adai vädisvuođah juátkojeh aainâs-uv oho verd.
Motomeh čyeđeh ulmuuh láá karttâm ijâstâllâđ Schiphol kirdemkiedist peŋkâi alne já lättest. Taat kuáská eromâšávt ulmuid, kiäin ij lah viisum Vuáládâhenâmáid, adai sij láá áigum tuš molsođ kirdemmaašin Amsterdamist. Taat ij lah luhostum, ige sist lah lope vyelgiđ olgos aalmugijkoskâsii haalist. Kirdemkiedi aldasijn leijee hotelleh láá tääl tievâ. Toh, kiäh láá peessâm, láá uuccâm ijjâsaje kirdemkiedi aldasijn.
Junájotolâh lii orostittum ollásávt luáppijâspeeivi iäge buusihkin vyeje. Tuše metro jotá motomij sojij. Automaađijeh láá njalahâsah, já olgosvyejimeh láá lamaš ennuv. Pyerá- já väzzimluodah iä tolluu áávus.
Schiphol kirdemkieddi lii pastam toollâđ tuše oovtâ vyelgim- já siäivumrađe áávus. Tast iä lah tuárvi čurgimmašineh toos, et puoh rađeh putestuuččii muottuin. Uđđâsijn lii savâstâllum tast, et taid ij kannat uástiđ tondiet, et ivveest láá tuše motomeh muottiis peeivih. Táválávt toh iä ollágin tarbâšuu.
Meiddei jieŋâputestemkolgos kirdemmašinij várás lii forgâ nuhâmin, mii toovât kirdemjotoluv paijeentoollâm vala váddásubbon. Putestemkolgos uástoo Saksaast, ige ton saksalâš toimâtteijee pyevti lopediđ toimâttemäigitaavluid.
Páihálâš Ruopsis ristâ lii iššeedškuáttám tullikuávlu nube peln tagarijd mađhâšeijeid, kiäh iä peesâ Schipholist kuussân kulij. Sij fäälih tiäđu, teejâ já savâstâllâmtorjuu. Tágárij mađhâšeijei várás, kiäh iä peesâ pááikán iäge pyevti vyelgiđ hotellângin, láá pieijum kieddiseeŋgah.
Uđđâseh várutteh ulmuid vyelgimist luodâ oolâ puurgâst, jis ij lah aaibâs pággu. Loppâookon láá meid lopedum puolâšeh.
Maaŋgah tábáhtumeh láá macâttum muottui keežild. Ovdâmerkkân taan uđđâs čällee lâi áigumin moonnâđ Rotterdamân väzzimmookán keččâđ vistettes ulmui tile kaavpugist já sahhiittâllâđ ulmuid. Taat ij tääl luhostuu, nuuvt et taam ferttee maŋeláá porgâđ.
Meiddei luonij viežžâm lii koskâldittum muotâvädisvuođâi keežild. Já purrâmušâi pááikántuálvooh iä uážu vyeijiđ nuuvt kuhháá ko muotâ hettee eellim.
Eellim luostarist lii šoddâm vädisin. Weert-nommâsii saajeest luostar puoh käävci nunnád láá puáccám já viällájeh seeŋgâst korrâ leencust kolmâs tiet. Luostar ij liegâduu ollágin. Liegâdempiergâseh láá kulmâ, mut toh láá puáráseh, já toh iä lah siämmáá saajeest, nuuvt et ij pyevti ovdâmerkkân lieggiđ tuše oovtâ viste. Šadda meendu tivrâsin liegâdiđ ubâ luostar, nuuvt et liegâdâsah láá jo-uv kiddâ teikâ áávus. Nunáh iä liijkágin haalijd vyelgiđ kuussân luostarist.
Motomeh sajeh láá liijká peessâm ávhástâllâđ muottuigijn. Ovdâmerkkân Kootwijk leirâsaje lii faallâm teltastâllâm muottiis meecist. Taah sajeh láá šoddâm pivnohin, já ulmui mielâst taat tile lii tego naharist. Ulmuuh piergejeh tobbeen pyereest, ko sist láá pyereh tälvipihtâseh já šiev uáđđimsekkâ.
Käldee:
– Morgenochtend code oranje in vrijwel hele land • Morgen minstens 800 vluchten geannuleerd (nos.nl)
Kove: Marja-Liisa Olthuis