Islandân lii kulluuttum etitile tullâvääri russoom paaloost. Pasepeivieehid ubâ Grindavík kaavpug Reykjanes njaargâst lii evakuistum ässei suojâlem keežild. Vuossaargâ motomeh ässeeh láá kuittâg luoštum váháš ááigán páikkásis. Äššitobdeeh iä määti árvuštâllâđ, kuás tullâvääri rusoškuát, mut russoom annoo tääl vyerdittetten.
Kuávlu lii ohtâ Island pivnohumos tuuriistkuávluin, já tobbeen lii meiddei ohtâ Island pivnohumos lávgudâttâmsoojijn, Čuovjis laaguun.
Ässei suojâlemteivâm tollui vuossargâiiđeed, ige tile lamaš ennustkin muttum pasepeeivist, veik seismisâš toimâ lâi-uv ucánjáhháá josijdum. Island áimutietteelágádâs mield seismisâšvuotâ lii pissoom suullân siämmáámuđusâžžân lávvárdâhiiđeed rääjist. Pasepeeivi ääigi kuávlust láá lamaš suullân 1 000 eennâmtuárgástussâd, moi intensiteet lii lamaš aainâs-uv 3,0 Richter ciäkkáduv mield.
Virgeomâhááh muštâleh, et ulmuid puáhtá adeluđ uánihis äigi velttidmettumis tiŋgâi čokkiimân já huápulij ašij tipšomân. Virgeomâhái mield tooimâid kolgâččij algâttiđ tállân, tastko rusomij máhđulâšvuotâ lii olluv.
Island radiofinnodâh Ríkisútvarpið ađai RÚV muštâl viermisijđostis pááikán luoštum ulmui reaktioin. Sahhiittâllum ulmuuh muštâleh huápust.
– Lii väädis finniđ ulmuid nuávdittiđ äigirääji, mii lii vittâ miinut jyehi pääihist, mut puohah láá nuuvt porgâm já sij ánsášeh kijttosijd, operaatio kieddihovdâ Ólafur Örvar Ólafsson muštâl.
Ulmuuh muštâleh, et huápu keežild sij iä lah kiergânâm piäluštiđ päihistis puoh, maid sij láá halijdâm.
Ovdil kaavpug evakuistem aalmugsuoijâlmist västideijee poolishovdâ Víðir Reynisson muštâlij, et etitääsi aktivistoo.
– Lii uáivilin evakuistiđ Grindavík, já piäluštempalvâlus etitääsi aktivistoo. Iänááš ässeeh láá jo kuáđđám kaavpug.
Lopâlâš miärádâs toimâi olášutmist já tooimânpiejâmist lii almolii torvolâšvuođâ já Suðurnes poolishoovdâ kieđâin. Pasepeeivi tullâvääri russoom máhđulâšvuottân arvâlui 60 prosentid.
Käldeeh:
– Tämä on tilanne hätätilanteen julistaneessa Islannissa nyt – Kaupunkilaisille viiden minuutin aikaraja (www.iltalehti.fi)
– Magma tunnel under Grindavík – eruption likely – LIVE (www.ruv.is)
– Dorp in IJsland geëvacueerd om dreigende vulkaanuitbarsting (nos.nl)
Kove: Olga Ernst (Wikimedia Commons)