Nato njunoščällee Jens Stoltenberg teeivâi Ruotâ uáiviminister Ulf Kristerssonáin já Tuurki president Recep Tayyip Erdoğanáin vuossaargâ Vilnaast. Uásipeleh savâstâllii Ruotâ jeessânvuođâst Natost. Stoltenberg toolâi journalistáid tieđettemtilálâšvuođâ vuossargeehid já muštâlij, et Turkki lii lopedâm ratifisistiđ Ruotâ Nato-jeessânvuođâ. Erdoğan lopedij sirdeđ Ruotâ jeessânvuotâääši Tuurki parlamentân nuuvt jotelávt ko máhđulâš.
Ruotâ lii lopedâm aktiivlávt tuárjuđ Tuurki Euroop unionân servâm sehe tullisopâmuš peividem já viisumrijjâvuođâ, čáálá eŋgâlâlâskielâlâš Daily Sabah.
Tukholma meid nonnij Tuurkin, et tot ij tuárju terrorornijdumijd PKK/YPG ige gülenistlii terrorjuávhu Nato-jeessânvuođâ maŋa já et Ankara já Tukholma kooskân huksejuvvoo kyevtipiälálâš torvolâšvuotâmekanism.
Ruotâ uáiviminister Ulf Kristersson lâi tuđâvâš miärádâsân já eeđâi vuossaargâ, et ”taat lii šiev peivi Ruotân”.
Ruotâ maŋa vala Uŋgar kalga ratifisistiđ Ruotâ jeessânvuođâ Naton. Vyerdimist lii, et taat tábáhtuvá jotelávt Tuurki ratifisistem maŋa. Uŋgar olgoašij minister Péter Szijjárttón mield Nato-jeessânvuođâ ratifisistem Uŋgarist lii tuše teknisâš koččâmuš. Uŋgar lii Tuurki lasseen áinoo Nato-eennâm, mii ij lah vala toohâm ratifisistem.
Ovdiláhháá Uŋgar lii almottâm, et tot ratifisist Ruotâ jeessânvuođâ talle ko Turkki lii vaalmâš ratifisistmân.
Käldee:
– Nato-maiden johtajat saapuvat kokouspaikalle (yle.fi)
Kove: Marek Studzinski (Pixabay)