Fagradalsfjall lii rusoškuáttám Islandist. Taat tullâvääri lii asâhánnáá kuávlust leevist eennâm viestârpeln, suullân 30 kilomeetter keččin uáivikaavpug Reykjavikist. Taan räi russoom ij lah tovâttâm vädisvuođâid kirdemjotolâhân ige tot lah hettim aassâm.
Tullâvääri čulgâškuođij laava pasepeeivi, mut tobbeen iä kirde kunnâpoolvah, almoot Island meteorologisâš lágádâs. Fagradalsfjall ij lah keila hámásâš tullâvääri, mast lii räigi kaskoo. Laava puátá olgos enâmist 900 meetterid kuhes luoddânmist. Tággáár häämi ij táválávt toovât stuorrâ kunnâpoolvâid. Laava cirgo olgos 200 meetter kobdoduvâst tego käldein tullâvääri roobdâin, mut ferttee uáiniđ, magarin te tile šadda, čielgee Island meteorologisâš lágádâs. Taat lii kuittâg smavvâ russoom taan räi.
Taankiärdásâš russoom lii Islandist jo kuálmád kuulmâ ive siste. Koskâmiärálávt tullâvärirusomeh tábáhtuveh Islandist neelji teikâ viiđâ ive kooskâi. Island lii koskâsii vulkaanlii saajeest Atlant väldimeerâ taveuásist. Islandist lâi jo vuordum, et tullâvääri russoom lii puátimin, tastko tien kuávlust lijjii registeristum tuhátteh smavvâ eennâmtuárgástusah. Tain korrâsumos tábáhtui pasepeivieehid, já tot lâi 5,2 Richter ciäkkáduvváin mittedmáin.
Kyehti ovdebáá russoom iä hettim eellim Islandist. Ive 2021 russoom ääigi laava kuulgâi motomijd mánuppoojijd, já toh koveh kiäsuttii čuođijd tuháttijd ulmuid. Taan tove ulmuuh láá váruttum, et russoomsajan ij koolgâ moonnâđ keččâđ, tastko kuávlust porgesteh varâliih kaasuh. Meiddei Reykjavik ässeeh láá rävvejum, et sij kalgeh toollâđ laasâid kiddâ iijâ ääigi já časkâdiđ áimučuáskudem. ”Mij ep pyevti tuárvi váruttiđ ulmuid, et sij iä monâččii russoomkuávlun. Já jis kiinii lii tääl tobbeen, te sun kalga vyelgiđ tállân meddâl”, tiädut Island kriisipalvâlus.
Islandist tábáhtui ive 2010 majemuš stuárráb tullâvärirussoom, ko Eyjafjallajökull čuulgâi stuorrâ kunnâpoolvâid áimoid. Taat tovâttij maaŋgâ piäiván vädisvuođâid kirdemjotolâhân. Eenâb ko 100 000 kirdemid lijjii macâttum, já ulmuuh karttii vyerdiđ pyereeb kirdemtile ton saajeest, kost sij jo talle lijjii.
Käldeeh:
– Vulkaan uitgebarsten in IJsland, lava over breedte van honderden meters uitgespuwd (nos.nl)
Kove: falco (Pixabay)