Ovtâstum staatâi president Joe Biden lii kolliistâllâm Suomâst koskohhoost tuorâstâhân. Sun lii savâstâllâm kyevtkoskân Suomâ presidentáin Sauli Niinistöin ovdil eres Tave-enâmij uáiviministerij puáttim. Ton maŋa puohah jotkii ohtsii savâstâllâm njunoščuákkimist. Taat kolliistâllâm Bidenân lâi vuosmuš Suomâst suu presidentvuođâ ääigi. Majemustáá president Donald Trump kolliistâlâi Suomâst ive 2018, ko sun teeivâi Ruošâ presidentáin Putináin.
Presidentkyevtis Biden já Niinistö tooláin mediatiäđáttâs tuorâstâheehid ovdil Biden vuolguu. Niinistö kiijtij Biden taan adelem torjust Suomân. Sun muštâlij, et suoi lává savâstâllâm meid Ukraina suáđist já tast, et Ukraina piälušt meid nuorttâenâmij áárvuid.
Niinistö muštâlij tieđettemtilálâšvuođâst, et suoi Bidenáin láán savâstâllâm Suomâ já Ovtâstum staatâi koskâvuođâst já enâmij piäluštemohtsâšpargoost.
Biden tiäduttij tom, et Nato oro tääl lemin oovtmielâlub ko kuássin:
- Mij tii littolâžžân halijdep, et tij tietivetteđ, et Ovtâstum staatah lii čonnâsum Suomân já Naton. Taah čonnâsumeh láá čovgâdeh. Mij piäluštep jyehi pitá Nato-kuávlust, já Suomâ tiäđust-uv kulá taas.
Ilo kullui peeivi ääigi presidentij saavâin meid tondiet, et Ruotâst šadda forgâpalij Nato tievâslâš jeessân.
Biden puáttim Euroopân sehe Vilna já Helsig čuákkimeh láá tuálvum Suomâ Nato váimusân, čáálá Ilta-Sanomat.
Mediatieđettemtilálâšvuođâ maŋa Biden tolvui kirdemkiädán, já sun lii jo päikkimääđhist.
Käldee:
– Biden ja Niinistö muistelivat lämmöllä yhteisiä kohtaamisiaan – ”Oli todella koskettavaa tuntea yhteys maiden välillä” (www.is.fi)
Kove: Marja-Liisa Olthuis