NASA lii pááččám mánudâšrakkeet máátkán cuáŋuimáánu vuosmuu peeivi tijme 18.35.12 EDT ađai tijme 01.35.12 Suomâ ääigi cuáŋuimáánu nube peeivi. Pääččim tábáhtui Floridast Kennedy Space Centerist. Pääččimrekinistmeh monnii vuáváámij mield, já rakkeet paččui tego lâi jurdâččum‑uv.
NASA vuolgâttij ubâ pääččimpeeivi reaaláigásávt Artemis II ‑mánudâškirdem tábáhtusâid, ko vuosmuš almaidittum kirdem valmâštâlmeh Mánudáá aldasáid paijeel viđâlov ihán lijjii joođoost.
Artemis lii nyevt love peeivi kukkosâš kirdem, mast nelji astronaut mađhâšeh Orion-komovuotâskijppáin Mánudáá pirrâ já puátih maassâd Enâmân. Koččâmuš lii iskoskirdemist, mon ulmen lii testađ vuáháduvâid astronautijgijn vuosmuu tove kieŋâlis komovuođâst.
Astronautij juávkun kuleh komendeijee Reid Wiseman, kirdee Victor Glover já missiospesialistkyevtis Christina Koch já kanadalâš Jeremy Hansen. Taat kirdem lii maaŋgânáál historjálâš: fáárust lii vuosmuš nissoonastronaut, vuosmuš tevkisliiškág astronaut já vuosmuš kanadalâš astronaut.
Pääččim várás kiävttoo Space Launch System ‑kyeddimrakkeet, mii lii NASA pehtilumos rakkeet. Vyelgimlaasâ lekkâsij ehidist páihálii ääigi, já šoŋŋâ já teknisiih ääših čuávvojii eromâš tárkká majemuu muudon.
Pääččimpeeivi ohjelmân kullii eereeb iärrás astronautij valmâštâllâm, sirdum pääččimvuálážân já majemuuh torvolâšvuotâtäärhistmeh. NASA fáálá määđhist reaaláigásijd peividmijd.
Taan tove meid táválijn ulmuin lii lamaš máhđulâšvuotâ kirdeđ fáárust Mánudâžân já finniđ tärhistemkoortâ kirdemmáátkán.
Artemis II lii kuávdáš uási Artemis-ohjelm ubâlâšvuođâst, mon ulmen lii macâttiđ ulmuu Mánudáá asan maŋeláá já huksiđ vuáđu Mars-kirdemáid. Taan kirdemmääđhi luhostume lii luhostume ubâ ohjelm joođhâ uáinust.
Käldeeh:
– LIVE: Artemis II Launch Day Updates (www.nasa.gov)
– NASA’s Artemis II Crew Launches to the Moon (Official Broadcast) (plus.nasa.gov)
Kove: NASA HQ (Wikimedia Commons)