Artemis II ‑mánudâš­kirdem irâttuv­voo nube tove

NASA lii oppeet sirdám Artemis II SLS ‑kyeddimrakkeet já Orion-komovuotâskiijpâ pääččimvuálážân 39 B Floridast Kennedy Space Centerist. Vástuppeeivi 20. peeivi porgum sirdem piištij ohtnubáloh tijmed. Taat lii jo nubbe sirdemkerdi rakettân, mii sirdui vuosmuu vyelgimirâttâs maŋa maassâd pääččimvuáláást čokkimhaalin rakettist kavnum avveedmij já viestâdemvädisvuođâi keežild. Tääl taah čuolmah láá čovdum.

Čyeđe meetter alosâš rakkeet jođettui pääččimvuálážân massiivlijn telasalvânvuáláin. Jođettempeivi sirdui ohtii ovttáin peivijn korrâ piegâ keežild. Tääl rakettân tahhojeh uđđâsist pääččim ovdedeijee valmâštâlmeh, main tehelâš lii nuuvt kočodum njuoskâ testam. Talle rakkeet tiävdoo puáldámuššáin já njammoo vuod kuárosin. Siämmást testajuvvojeh meid jienâohtâvuođah já máhđuliih avveedmeh.

Kuás rakkeet páččoo?

Pääččim lii vuávájum tolemustáá koskookon cuáŋuimáánu vuosmuu piäiván. Pääččimlaasâ juátkoo cuáŋuimáánu kuuđâd peeivi räi. Jis taah peeivih iä luhostuu, te cuáŋuimáánust lii vala ohtâ máhđulâš pääččimlaasâ máánu kulmâlovváád peeivi. Pääččimlaasâ lii tai peivij áávus 120 minuttid, jo‑uv ovdil piäiváályeštim teikâ piäiváályeštim maŋa čuávuvávt:

  • 1.4. 1,28 tijme ovdil pl.
  • 2.4. 0,32 tijme ovdil pl.
  • 3.4. 0,30 tijme ovdil pl.
  • 4.4. 1,17 tijme maŋa pl.
  • 5.4. 1,95 tijme maŋa pl.
  • 6.4. 2,87 tijme maŋa pl.
  • 30.4. 1,86 tijme ovdil pl.

Astronauteh karanteenist

Astronauteh láá tääl sirdum karanteenân ovdil pääččim. Taat karanteen pištá kyehti oho. Tot tahhoo tondiet, et sij iä puáccááččii ovdil vuolguu. Karanteen ääigi sij hárjuttâlleh puohlágánijd etitiilijd já toi čuávdim kirdem ääigi. NASA-astronauteh Reid Wiseman, Victor Glover já Christina Koch sehe Kanada komovuotâornijdume astronaut Jeremy Hansen kirdettuvvojeh pääččimsajan vittâ peeivi ovdil vuávájum pääččimlaasâ lekkâsem já juátkih karanteenis meid tobbeen.

Vuosmuš kirdem ive 1972 maŋa

Artemis II ‑kirdem lii vuosmuš almaidittum kirdemmätki Mánudâžân Apollo 17 ‑kirdem maŋa juovlâmáánust 1972. Artemis II ij vala siäivu Mánudâžân pic kirdá Mánudáá pirrâ. Vuosmuš almaidittum siäivum Mánudâžân lii tääl smiettum Artemis IV ‑kirdemân ive 2028 aalgâkeččin.

Käldeeh:
– NASA’s Artemis II Rocket Arrives at Launch Pad 39B (www.nasa.gov)
– Artemis II Mission Availability – April 2026 (www.nasa.gov)

Kove: NASA / James Blair

Kommenteh

Čääli komment

Čääli komment.
Čääli noomâd teehin.

Luuvâ meid

Uđđâsumos uđđâseh

Suomâ, Taažâ já Kanada räije­jeh ryeš­šilij valas­tellei viisu­mijd

Suomâ haldâttâs meridij tuorâstuv staatârääđi almosčuákkimist, ete tot čavgee viisumij mieđettem ryeššiláid valastelleid. Suomâ olgominister Elina Valtosii (kok.) mield Ruoššâ kiävttá valastâllâm propaganda koskâuámmin. –...

Anarâškielâ servi almostit kyehti párnái­kirje skammâ­máánust

Anarâškielâ servi lii juátkám párnái- já nuorâikirjij almostittem. Tot almostit kyehti kirje 40‑ive juhlij ohtâvuođâst. Mainâsij ihe – Ijâttes ijjâ Vuosmuš tääl almostuvvee kirje lii párnái...

Kollekielâ-palhâ­šume mieđet­tui emeritus­professor Nils Øivind Helan­derân

Taankiärdásâš Kollekielâ-palhâšume lii mieđettum emeritusprofessor Nils Øivind Helanderân. Palhâšume mieđettui sunjin kuhes já maaŋgâpiäláág eellimpargoost sämikielâi oovdedmist. Palhâšume keigejui sunjin Helsigist skammâmáánu 11. peeivi....

Suomâ šoŋŋâ­dâh lii lieg­gân­min torvo­lii rääji paijeel

Taan ive keesi lâi vaigâd Euroopân. Koskâ- já Maadâ-Euroopist lijjii korrâ pakkâpajeh, juuvah kuškii já sehe elleeh já ulmuuh killájii. Pakkâseh maksii Euroopân joba...

Sämikielâ­liih Muččâ­dumos juovlâ­lavluuh ‑tilálâš­vuođah uárne­juv­vojeh uđđâ päikki­kuu­dijn

Sämikielâliih muččâdumos juovlâlavluuh lávlojeh oppeet skammâ- já juovlâmáánust pirrâ Suomâ. Taaijuv tilálâšvuotâ uárnejuvvoo vuosmuu tove meiddei Kuopiost já Lappeenrantast, muštâl Oulu pispekodde tiäđáttâsâstis. ”Sämikielâliih juovlâlavluuh...