Ovdâskodde tuhhiittij kieskâd lahânubástusâid, moh pođižeh vuáimán cuáŋuimáánu 14. peeivi. Nubástusâi mieldi rävisulmuuh finnejeh virgeomâhái viestâid vuosâsajasávt šleđgâlávt Suomi.fi-palvâlusân. Taah viestah láá eereeb iärrás viärutteijee miärádâsah, almottâsah jienâstemvuoigâdvuođâst, poolis vuolgâttem huámášutmeh já sááhuh sehe kieldâi já pyereestvaijeemkuávlui viestah. Aaibâs puoh virgeomâhâšpostâ ij vala puáđi palvâlusân, mutâ meeri lassaan ain.
Staatâvarijministeriö áárvu mield uđâsmittem puáhtá luuvij miljovnij euroi šiäštu ihásávt, ko iänááš pävirpostâ mulsâšuvá šleđgâlâžžân.
Maht toimâđ?
Šleđgâlii virgeomâhâšpoostâ finnim várás aalmugjeessân ferttee vuáđudiđ jieijâs tili Suomi.fi-palvâlusâst. Ton kevttim lii nuuvtá. Jis ulmust ij vala lah tili, te tast almottuvvoo ain ko sun čáládât siisâ virgeomâhái palvâlussáid, tego viärutteijee palvâlusân. Tääl Suomi.fi-tili lii kiävtust 2,6 miljovn persovnist Suomâst, ađai suullân kyehti miljovn olmožid kolgâččii lehâstiđ tili čuávuvái ohoi ääigi.
Jis kiinii ij kuittâg keevti virgeomâhái digipalvâlusâid ige kievrâs tubdâttâttâm, te virgeomâhâšpostâ puátá puátteevuođâst‑uv pävirhäämist. Täst ij taarbâš porgâđ sierâ almottâs. Uđâsmittem ij meidgin kuoskâ vyeliahasáid, hovdimvuálásáid ige tagaráid olgosyemmiláid já enâmânvärrejeijeid, kiäin ij lah kiävtust syemmilâš tubdâttâttâmpalvâlus. Virgeomâháiguin puáhtá ain ášástâllâđ meid puhelimáin já pääihi alne.
Vyerdimist tájuttemkeččâlmij lasanem
Virgeomâhái mield tájutteijeeh vuolgâtteh ovdâmerkkân tekstâviestâid já Whatsapp-viestâid Suomi.fi-palvâlus noomáin, mutâ toid ij uážu reagistiđ ige liiŋkâid spokkâlistiđ.
– Puoh pyeremus lii ain jieš čäälliđ lađđui ”suomi.fi” teikâ kevttiđ Suomi.fi-moobiilheiviittâs. Toin piäsá jotelávt rievtis tiäđu kuuvl, muštâl Digi- já aalmugtiätulágádâs eromâšäššitobdee Karoliina Liimatainen.
Käldee:
– Viranomaisposti tulee huhtikuussa ensisijaisesti Suomi.fi:hin – kahdelta miljoonalta puuttuu vielä tili (yle.fi)
Kove: Valtteri Valkeapolku