Euroop union kuávlust ääsih tääl paijeel 450 miljovn olmožid, muštâluvvoo Euroop union statistiikvirgeomâháá Eurostat vorâs raportist. EU olmoošloho lii pajanâm nelji ive maŋaluvâi. Pajanem suijân lii enâmânvarrim.
Raapoort mield 1.1.2025 EU:st assii suulân 450,4 miljovn olmožid. Tot lii 1 070 702 olmožid eenâb ko moonnâm ive.
Enâmustáá ulmuuh ääsih Saksaast (83,6 miljovn olmožid), Ranskaast (68,6 miljovn) já Italiast (58,9 miljovn). Tai kuulmâ eennâm olmoošloho lii joba 47 % ubâ EU:st. Ucemustáá ulmuuh ääsih Maltast (0,6 miljovn), Luxemburgist (0,7 miljovn) já Kyprosist (1 miljovn). Suomâst ääsih 5,6 miljovn olmožid ađai 17. enâmustáá.
Olmoošloho pajanij 19 EU-enâmist. Enâmustáá pajanii Malta (+19 ulmuin jyehi 1 000 ulmuu uásild), Irland (+16) já Luxemburg (+14,7) olmoošlovoh. Olmoošloho kiäppánij 8 enâmist, enâmustáá Latviast (-9,9 ulmuin jyehi 1 000 ulmuu uásild), Uŋgarist (-4,7) sehe Puolast já Eestienâmist (-3,4).
Euroop union olmoošlovo pajanem lii hiđásmâm. Vala 1960-lovvoost tááláá Euroop union staatâi olmoošloho pajanij koskâmiärálávt 3 miljovnáin ulmuin ivveest. Iivij 2005–2024 tot lii pajanâm koskâmiärálávt tuše 0,9 miljovnáin ulmuin ivveest. Ton lasseen ivveest 2012 ovdâskulij EU:st ulmuuh láá jáámmám eenâb ko šoddâm. Tááláá ääigi olmoošloho paijaan-uv enâmânvarrim tiet. Nuuvtpa ive 2021 EU olmoošloho kiäppánij, tastko koronapandemia raijij enâmânvarrim Euroopân.
Käldeeh:
– EU population increases for the 4th consecutive year (ec.europa.eu)
– EU:n väkiluku ylitti 450 miljoonaa – neljäs kasvuvuosi putkeen (yle.fi)
Kove: European Union (Wikimedia Commons)