Ryeššilâš tennisspellee Daniil Medvedev lii vuáittám ATP-tennisturnam Dubaist, Ovtâstum arabiemiirikuudijn. Turnam kulá ATP 500 -turnamrááiđun, mii meerhâs tom, et vyeittee finnee 500 čuággád. Fiinaal spellui njuhčâmáánu 4. peeivi 2023. Finalist Medvedev vuotij Andrey Rublev 6–2, 6–2. Rublev-uv lii vuálgus Ruošâst. Semifinalist Medvedev lâi vuáittám serbialii spellee Novak Đoković 6–4, 6–4. Đoković lii tääl 1. saajeest maailmlistoost já lii meid ohtâ pyeremuin tennisspellein historjást.
Taat lii Medvedevân jo kuálmád turnamvuáittu maŋaluvâi. Moonnâm ohhoost sun vuoitij ATP 250 -rááiđun kullee turnam Dohast Qatarist. Talle finalist sun vuoitij brittilii spellee Andy Murray 6–4, 6–4. Kyehti oho tassaaš vist sun vuoitij ATP 500 turnam Rotterdamist Vuáládâhenâmijn. Tobbeen finalist sun vuoitij Italia tááláá pyeremuu tennisspellee Jannik Sinner 5–7, 6–2, 6–2.
Onne Medvedev maađhâš Ovtâstum Staatáid, kost čuávuvái neelji oho ääigi sun spiällá vistig Indian Wellsist Californiast já talle Miamist Floridast. Indian Wells já Miami tennisturnaameh kuleh ATP 1000 -turnamrááiđun ađai toh láá uáli jo teháliih turnaameh. Tuše Grand Slam -turnaameh já ATP Finals láá teháluboh ko ATP 1000 -rááiđu turnaameh.
Medvedev lâi maailmlisto 1. saajeest ohtsis 16 okkod ive 2022. Tääl sun lii 6. saajeest. Jis sun spiällá pyereest Indian Wellsist já Miamist njuhčâmáánust, te sust lii šiev máhđulâšvuotâ peessâđ maassâd 1. sajan maŋeláá taan ive.
Käldee:
– Medvedev Seals Hard-Court Hat-Trick With Dubai Trophy (www.atptour.com)
Kove: alisulimanart (Pixabay)